اوسلو میں جمعے کو پاکستان اسٹریٹ چائلڈ ٹیم نے سپر فور مرحلے میں بریمنز کو 2-0 سے شکست دے کر ناروے کپ 2023 کے فائنل میں جگہ بنالی ہے۔

سیمی فائنل میں پاکستان اسٹریٹ چائلڈ ٹیم کی جانب سے عابد علی اور عبداللہ نے گول اسکور کیے جب کہ پاکستان نے ٹورنامنٹ میں مسلسل ساتویں جیت حاصل کی ہے اور انہیں ایک میچ میں بھی شکست نہیں ہوئی ہے۔

پاکستان نے مجموعی طور پر ٹورنامنٹ میں 28 گول اسکور کیے ہیں جب کہ وہ ٹورنامنٹ کی فتح سے صرف ایک قدم دور ہیں۔

اس سے قبل کوارٹر فائنل میچ میں پاکستان نے سینڈویکن کو 2-0 سے شکست دے کر سیمی فائنل تک رسائی حاصل کی تھی جب کہ کوارٹر فائنل میں دونوں گول فیصل نے اسکور کیے تھے۔

ناروے میں پاکستان کی سفیر سعدیہ الطاف قاضی نے بھی منگل (یکم اگست) کو پاکستانی ٹیم سے ملاقات کی تھی اور اس موقع پر انہوں نے ٹورنامنٹ میں ٹیم کی اب تک کی کارکردگی کو سراہا تھا۔

واضح رہے کہ پاکستان ایک فلاحی تنظیم مسلم ہینڈز کے بینر تلے ناروے کپ میں حصہ لے رہا ہے اور یوں مسلم ہینڈز ایف سی کے نام سے کھیل رہا ہے۔

ٹورنامنٹ میں کل 2,350 ٹیمیں اور تقریباً 30,000 کھلاڑی مختلف مقابلوں میں حصہ لے رہے ہیں۔

یاد رہے کہ گزشتہ سال دوحہ میں ہونے والے اسٹریٹ چائلڈ ورلڈ کپ میں پاکستانی ٹیم رنر اپ رہی تھی۔ پاکستان ٹیم پورے ٹورنامنٹ میں ناقابل شکست رہی تھی لیکن فائنل میں انہیں مصر کے خلاف پینالٹی پر (4-3) سے شکست ہوئی تھی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں