انٹرنیشنل لیگ ٹی ٹوئنٹی کے دوسرے سیزن میں قومی کھلاڑیوں کی شرکت کی تصدیق کردی گئی ہے۔

انٹرنیشنل لیگ ٹٰی ٹوئنٹی (آئی ایل ٹی ٹوئنٹی) کے دوسرے سیزن کے لیے پاکستانی کھلاڑیوں کو اجازت مل گئی ہے جس کے بعد لیگ کے منتظمین نے جوش و خروش کا اظہار کیا ہے۔

آئی ایل ٹی ٹوئنٹی کے چیف آپریٹنگ آفیسر سبحان احمد نے ٹورنامنٹ میں اعلیٰ معیار کے پاکستانی کھلاڑیوں کو شامل کرنے کے بارے میں امید کا اظہار کیا ہے۔

سبحان احمد کا خبر رساں ادارے سے گفتگو میں کہنا تھا کہ ’’یہ آئی ایل ٹی ٹوئنٹی کے لیے بڑی خبر ہے کہ پی سی بی نے اپنے کھلاڑیوں کو این او سی جاری کردیا ہے‘‘۔

انہوں نے کہا کہ ’’ہم سیزن ٹو میں اعلیٰ معیار کے پاکستانی کھلاڑیوں کو دیکھنے کے لیے پر امید ہیں اور اس سے ٹورنامنٹ کو فروغ ملے گا‘‘۔

تاہم ٹورنامنٹ میں شرکت کے حوالے سے پاکستان کے مخصوص کھلاڑی کی تصدیق ہونا ابھی باقی ہے۔

ذرائع کے مطابق شاہین آفریدی کو پی سی بی نے ایک ہفتے کے لیے آئی ایل ٹی 20 میں شرکت کی اجازت دے دی ہے۔ پاکستان کے دیگر کھلاڑی بھی اپنی دستیابی کے لحاظ سے فیصلہ کریں گے۔

واضح رہے کہ رواں سال جون کے شروع میں پی سی بی نے ایمریٹس کرکٹ بورڈ سے درخواست کی تھی کہ وہ انٹرنیشنل لیگ ٹی ٹوئنٹی کے اگلے ایڈیشن کے شیڈول کو ایڈجسٹمنٹ کرے۔

انٹرنیشنل لیگ ٹی ٹوئنٹی کا دوسرا ایڈیشن فی الحال 2024 میں 13 جنوری سے 12 فروری تک ہونا ہے تاہم پاکستان سپر لیگ کے ساتھ تصادم کی وجہ سے پی سی بی نے اپنے کھلاڑیوں کو ایڈجسٹ کرنے کے لیے دس دن کی رعایت مانگی تھی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں