ٹاپ اینڈ ٹی ٹوئنٹی سیریز میں میلبرن اسٹارز کو 43 رنز سے شکست دے کر پاکستان شاہینز نے لگاتار تیسری کامیابی حاصل کرلی ہے۔

پاکستان شاہینز نے عمدہ کارکردگی کو جاری رکھتے ہوئے ٹاپ اینڈ ٹی ٹوئنٹی سیریز میں میلبرن اسٹارز کو 43 رنز سے شکست دے دی۔ اس میچ کی خاص بات اوپنر شاویز عرفان کی نصف سنچری تھی۔

چھ ٹیموں کے اس ٹورنامنٹ میں یہ پاکستان شاہینز کی لگاتار تیسری کامیابی ہے۔ اس سے قبل انہوں نے اے سی ٹی کامیٹس کو9 وکٹوں اور میلبرن رینی گیڈز کو 8 رنز سے شکست دی تھی جب کہ این ٹی اسٹرائیک کے خلاف انہیں 59 رنز سے شکست کا سامنا کرنا پڑا تھا۔

اس میچ میں پاکستان شاہینز نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 6 وکٹوں کے نقصان پر 169 رنز بنائے۔

جواب میں میلبرن اسٹارز کی ٹیم 17 اعشاریہ ایک اوورز میں 8 وکٹوں کے نقصان پر 126 رنز بناسکی جب کہ ان کے دو بیٹرز انجرڈ ہونے کی وجہ سے بیٹنگ کرنے کی پوزیشن میں نہیں تھے۔

شامل حسین اور شاویز عرفان نے اعتماد سے اننگز کا آغاز کیا اور صرف پانچ اوورز میں 60 رنز کی شراکت قائم کرڈالی۔ پاکستان شاہینز نے 100 رنز 11 ویں اوور میں مکمل کرلیے تھے۔

شامل حسین 16 گیندوں پر 25 رنز بناکر آؤٹ ہوئے جس میں پانچ چوکے شامل تھے۔ شاویزعرفان نے اپنی نصف سنچری 32 گیندوں پر مکمل کی۔ انہوں نے 5 چوکوں اور 4  چھکوں کی مدد سے 65 رنز کی اہم اننگز کھیلی۔

ان کے آؤٹ ہوتے ہی پاکستان شاہینز کی تین وکٹیں اسکور میں صرف 2 رنز کے اضافے پر گرگئیں جن میں کپتان روحیل نذیر 16 اور عرفات منہاس بغیر کوئی رن بنائے آؤٹ ہوگئے۔

وہاج ریاض کے دو چوکوں اور ایک چھکے کی مدد سے 28 رنز ناٹ آؤٹ اور احمد خان کے ایک چھکے کی مدد سے 19 رنز کی وجہ سے پاکستان شاہینز 169 تک پہنچنے میں کامیاب ہوئی۔

ان دونوں نے چھٹی وکٹ کی شراکت میں قیمتی 44 رنز کا اضافہ کیا۔ میلبرن اسٹارز کی طرف سے رائلے مارک اور ارجن نائر نے دو دو وکٹیں حاصل کیں۔

میلبرن اسٹارز کی اننگز میں  ٹام راجرز اور ہیری ڈکسن نے 45 رنز کا اچھا اسٹارٹ دیا۔ ڈکسن 14 گیندوں پر 5 چوکوں اور ایک چھکے کی مدد سے 32 رنز بناکر رن آؤٹ ہوگئے۔

راجرز کو13 رنز پر فیصل اکرم نے آؤٹ کردیا۔ ہریش کانن 11 رنز بناکر رن آؤٹ ہوئے تو میلبرن اسٹارز کا اسکور 3 وکٹوں پر 71 رنز تھا۔

پاکستان شاہینز نے میچ پر گرفت اس وقت دوبارہ مضبوط کی جب 12 رنز کے اضافے پر عالیان محمود۔ فیصل اکرم اور عرفات منہاس میلبرن اسٹارز کی تین وکٹیں حاصل کرنے میں کامیاب ہوئے جن میں 31 رنز بنانے والے ارجن نائر کی وکٹ بھی شامل تھی۔

پاکستان شاہینز کی طرف سے فیصل اکرم نے 24 رنز دے کر2 وکٹیں حاصل کیں۔

واضح رہے کہ پاکستان شاہینز اپنا پانچواں اور آخری میچ جمعہ کے روز  پاپوا نیوگنی خلاف کھیلے گی۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں