گزشتہ روز ایشیاکپ سپر فور مرحلے کے میچ میں پاکستان کو سری لنکا کے ہاتھوں شکست کا سامنا کرنا پڑا ہے۔

ایشیاکپ 2023 کے میچز جاری ہیں جس کے سپر فور مرحلے کا اہم میچ گزشتہ روز کولمبو میں پاکستان اور سری لنکا کی ٹیموں کے درمیان کھیلا گیا۔

اس میچ میں پاکستان نے سری لنکا کو جیت کے لیے 252 رنز کا ہدف دیا جس کو سری لنکا نے 8 وکٹوں کے نقصان پر آخری گیند پر پورا کرتے ہوئے فائنل کے لیے کوالیفائی کرلیا ہے۔

بارش کی وجہ سے میچ میں تاخیر ہوئی جس کے نتیجے میں اوورز کی تعداد فی سائیڈ 45 اوور تک کردی گئی، 27 ویں اوور کے اختتام پر پاکستان کا اسکور 4 وکٹوں کے نقصان پر 128 رنز تھا جس کے بعد بارش شروع ہوگئی۔

28 ویں اوور کی چوتھی گیند پر محمد نواز آؤٹ ہوگئے جس کے بعد بارش کے وقفے سے قبل پاکستان ٹیم کا اسکور 5 وکٹوں کے نقصان پر 130 رنز ہوگیا۔

وقت کی کمی کے باعث میچ کو 42 اوورز فی سائیڈ تک محدود کردیا گیا جب کہ پاکستان نے محمد رضوان کے 86 رنز کی بدولت شاندار واپسی کرتے ہوئے آخری دس اوورز میں 102 رنز اسکور کیے۔

تاہم کہانی میں موڑ کی ایک اہم وجہ ڈی ایل ایس طریقہ رہا اور سری لنکا کا ہدف اننگز کے درمیانی وقفے کی وجہ سے ایک رنز کم ہوگیا جو بارش کی تاخیر سے عین قبل پاکستان نے اپنی پانچویں وکٹ گنوانے سے حاصل کیا تھا۔

اگر محمد نواز بارش کے وقفے سے قبل اپنی وکٹ بچانے میں کامیاب رہتے تو ممکنہ طور پر ہدف ایڈجسٹ نہیں کیا جاتا یا پھر نتائج کو تبدیل کرتے ہوئے اسے بڑھایا بھی جاسکتا تھا۔

بھارتی کمنٹیٹر ہرشا بھوگلے کا پاکستان کی جانب سے ایک اور اہم موقع کو ضائع کرنے پر روشنی ڈالتے ہوئے کہنا تھا کہ ’’پاکستان نے آخری گیند پر رن آؤٹ کا موقع ضائع کردیا کیونکہ جس وقت زمان خان نے گیند کروائی تو اس سے قبل ہی نان اسٹرائیکر پتھیرانا کریز سے آگے بڑھ چکے تھے‘‘۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں