سابق کرکٹر رمیز راجہ، شعیب ملک اور وقار یونس نے ورلڈ کپ میں سری لنکا کے خلاف شاہین آفریدی کی بولنگ پر تشویش کا اظہار کیا ہے۔

سری لنکا کے خلاف میچ کے دوران کمنٹری کرتے ہوئے رمیز راجہ نے شاہین آفریدی کی زخمی انگلی کے بارے میں تشویش کا اظہار کرتے ہوئے انکشاف کیا کہ فاسٹ بولر اس وقت بولنگ کے دوران درد کا سامنا کررہے ہیں۔

سابق کرکٹر شعیب ملک نے مقامی میڈیا کے اسپورٹس پروگرام میں گفتگو کرتے ہوئے شاہین آفریدی کی رفتار اور نئی گیند سے وکٹ لینے کی صلاحیت کی اہمیت کو اجاگر کیا۔

انہوں نے شاہین آفریدی کو مشورہ دیتے ہوئے کہا ’’انہیں ٹیم کے فزیو تھراپسٹ اور ٹرینر کے ساتھ مل کر اپنی اوسط بولنگ کی رفتار میں کمی کو دور کرنے کے لیے کام کرنا ہوگا‘‘۔

انہوں نے شاہین آفریدی کی رفتار میں کمی پر تشویش کا اظہار کرتے ہوئے کہا ’’جب سے وہ انجری سے صحتیاب ہوئے ہیں تو ان کی رفتار پہلے جیسی نہیں رہی‘‘۔

شعیب ملک نے مزید کہا کہ ابھی پاکستان کے آسٹریلیا، بھارت اور جنوبی افریقہ جیسی ٹیموں سے میچز ہونے باقی ہیں لہذا ٹیم مینجمنٹ کو شاہین کے ساتھ بیٹھ کر اس مسئلے کو حل کرنا چاہیے۔

دوسری جانب سابق کپتان وقار یونس کہتے ہیں ’’پاکستان اُس وقت کامیاب ہوتا ہے جب شاہین ابتدا ہی میں بہترین بولنگ کا مظاہرہ کرتے ہوئے وکٹیں حاصل کرتے ہیں اور کئی سالوں سے وہ ایسا ہی کرتے آئے ہیں‘‘۔

انہوں نے کہا کہ وہ آج بھی صلاحیت رکھتے ہیں لیکن ابھی انہیں کافی مشکلات درپیش ہیں، امید ہے کہ وہ مورنے مورکل کے ساتھ بیٹھ کر اس مسئلے کو حل کرلیں گے۔

واضح رہے کہ شاہین آفریدی ورلڈکپ کے گزشتہ میچز کے دوران آؤٹ آف فارم نظر آئے ہیں جب کہ وہ ابتدائی اوورز میں بھی وکٹیں حاصل کرنے میں کامیاب نہیں رہے۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں