ایک روزہ پاکستان کپ کے دوسرے سیمی فائنل میں کراچی وائٹس نے ملتان ریجن کو 43 رنز سے شکست دے دی۔

صائم ایوب کے شاندار 95 رنز، سہیل خان اور غلام مدثر کی عمدہ بولنگ کی بدولت کراچی وائٹس  نے ملتان ریجن کو پاکستان کپ ایک روزہ کرکٹ ٹورنامنٹ کے دوسرے سیمی فائنل میں 43 رنز سے شکست دیدی جب کہ کم روشنی  کی وجہ سے اس میچ کا فیصلہ ڈک ورتھ لوئس قانون کے تحت ہوا۔

اب کراچی وائٹس اور پشاور ریجن کے درمیان فائنل اتوار کے روز پنڈی کرکٹ اسٹیڈیم میں کھیلا جائے گا۔ پشاور نے پہلے سیمی فائنل میں فاٹا کو 44  رنز سے شکست دی تھی۔

جمعہ کے روز پنڈی کرکٹ اسٹیڈیم راولپنڈی میں کھیلے گئے سیمی فائنل میں ملتان نے ٹاس جیت کر کراچی وائٹس کو بیٹنگ کی دعوت دی جو 44.3 اوورز میں 280 رنز بناکر آؤٹ ہوگئی۔

ملتان نے 41 اوورز میں 9 وکٹوں کے نقصان پر229 رنز بنائے تھے کہ کم روشنی کی وجہ سے کھیل کو روک دیا گیا اور میچ کا فیصلہ ڈک ورتھ لوئس قانون کے تحت کیا گیا۔

کراچی وائٹس کے اوپنرز شان مسعود اور صائم ایوب نے پہلی وکٹ کی شراکت میں 106 رنز کا اضافہ کیا۔ شان مسعود پانچ چوکوں کی مدد سے 41 رنز بناکر آؤٹ ہوگئے۔

صائم ایوب نے اس سیزن میں اپنی شاندار بیٹنگ کے سلسلے کو جاری رکھتے ہوئے 86 گیندوں پر 95 رنز کی اننگز کھیلی جس میں 12 چوکے اور ایک چھکا شامل تھا۔ حبیب اللہ 40 دانش عزیز 33 اور کپتان سرفراز احمد 28 رنز بنانے میں کامیاب رہے۔

ملتان کی جانب سے محمد عمران نے 58 رنز دے کر 3 وکٹیں حاصل کیں۔ محمد صداقت اور فیصل اکرم نے دو دو کھلاڑیوں کو آؤٹ کیا۔

ملتان کو ابتدا ہی میں دو وکٹوں کا نقصان اٹھانا پڑا۔ غلام مدثر نے شرجیل خان کو صفر اور زین عباس کو 6 رنز پر آؤٹ کردیا۔ صہیب مقصود اور حسیب اللہ کے درمیان نصف سنچری شراکت قائم ہوئی تاہم صہیب مقصود 32 رنز بناکر آؤٹ ہوگئے۔

حسیب اللہ کی شاندار سنچری بھی اپنی ٹیم کو جتوانے کے لیے ناکافی ثابت ہوئی۔ انہوں نے 108 گیندوں پر 12 چوکوں اور 2 چھکوں کی مدد سے 106 رنز بنائے اور ناٹ آؤٹ رہے۔

سہیل خان کراچی وائٹس کے سب سے کامیاب بولر رہے، انہوں نے 44 رنز دے کر4 وکٹیں حاصل کیں جب کہ غلام مدثر نے دو وکٹیں حاصل کیں۔