سابق بھارتی کرکٹر گوتم گمبھیر نے ٹی ٹوئنٹی ورلڈکپ 2024 میں پاک بھارت فائنل کی خواہش ظاہر کردی۔

سابق بھارتی بیٹر گوتم گمبھیر نے حالیہ انٹرویو میں مخالف ٹیم کی بدقسمتی پر خوش ہونے کے بجائے کامیابی کا جشن منانے کی ضرورت پر زور دیا۔

انہوں نے کہا ’’آئی سی سی ٹی ٹوئنٹی ورلڈکپ 2024 میں بھارت اور پاکستان ایک دوسرے کے مدمقابل ہوں گے اور ہوسکتا ہے کہ دونوں ٹیمیں فائنل کے لیے کوالیفائی کرجائیں‘‘۔

ان کا کہنا تھا ’’ایسا نہیں ہونا چاہیے کہ اگر پاکستان کسی ٹیم کے خلاف ہار جائے تو بھارتی شائقین اس کا جشن منائیں یا پھر بھارت کی شکست پر پاکستانی شائقین جشن منانا شروع کردیں‘‘۔

گوتم گمبھیر نے شائقین کو مشورہ دیتے ہوئے کہا ’’دوسروں کی ناکامیوں میں خوشیاں ڈھونڈنے کے بجائے اپنی ٹیم کی کامیابیوں میں خوشیاں تلاش کریں‘‘۔

سابق بھارتی کرکٹر کہتے ہیں ’’کسی اور کی شکست کا جشن منانا بے معنی ہے، یہ ایک منفی رویہ ہے اور اس ذہنیت کو بدلنے کا وقت آگیا ہے جب کہ لوگوں نے سوشل میڈیا پر مشہور ہونے کی خاطر ایسی حرکتیں شروع کردی ہیں‘‘۔

یاد رہے کہ ٹی ٹوئنٹی ورلڈکپ 2024 ویسٹ انڈیز اور امریکہ میں منعقد ہونے جارہا ہے جس کے میچز 4 سے 30 جون تک کھیلے جائیں گے۔

تاریخ میں پہلی مرتبہ امریکہ کسی بین الاقوامی کرکٹ ایونٹ کی میزبانی کرنے جارہا ہے جب کہ اس حوالے سے آئی سی سی کی ٹیم نے امریکہ میں ممکنہ مقامات کا معائنہ بھی کرلیا ہے۔