ٹیسٹ ٹیم کے کپتان شان مسعود نے دورہ آسٹریلیا کے لیے وکٹ کیپر کے حوالے سے کھل کر بتادیا۔

پاکستان ٹیسٹ ٹیم کے کپتان شان مسعود نے سرفراز احمد پر اعتماد کا اظہار کرتے ہوئے کہا کہ دورہ آسٹریلیا کے لیے بطور وکٹ کیپر وہ ہماری پہلی پسند ہوں گے۔

بدھ کو لاہور میں پریس کانفرنس کرتے ہوئے شان مسعود نے نیوزی لینڈ کے خلاف آخری ہوم سیریز میں سرفراز احمد کی شاندار کارکردگی پر روشنی ڈالی جس میں انہیں سیریز کا بہترین کھلاڑی قرار دیا گیا تھا۔

انہوں نے کہا ’’سرفراز احمد نیوزی لینڈ کے خلاف آخری ہوم سیریز میں سیریز کے بہترین کھلاڑی تھے، انہوں نے سری لنکا میں بھی اچھی کارکردگی کا مظاہرہ کیا اور ٹیم میں اپنی جگہ پکی کی جب کہ وہی ٹیم میں سیٹلڈ وکٹ کیپر ہیں‘‘۔

علاوہ ازیں انہوں نے محمد رضوان کے بطور بیٹر آسٹریلیا میں ٹریک ریکارڈ کا حوالہ دیتے ہوئے کہا ’’بطور بیٹر ہمیں محمد رضوان کی ضرورت پیش آسکتی ہے کیونکہ آسٹریلیا میں ان کا ٹریک ریکارڈ شاندار رہا ہے‘‘۔

انہوں نے کہا ’’جب پاکستان نے پچھلے مرتبہ ٹیسٹ میچز کے لیے آسٹریلیا کا دورہ کیا تھا تو رضوان سب سے زیادہ رنز بنانے والے کھلاڑیوں میں سے ایک تھے‘‘۔

شان مسعود نے کہا کہ ’’ہم آسٹریلیا جاکر پہلے وہاں کے حالات کا جائزہ لیں گے اور پھر اپنی پلیئنگ الیون کا فیصلہ کریں گے‘‘۔

کپتان نے مزید کہا ’’آسٹریلیا میں ہمیں ایسی صورت حال کا بھی سامنا کرنا پڑسکتا ہے جب ہمیں ایک اسپنر کو چھوڑ کر ایک اضافی بلے باز کی ضرورت ہوسکتی ہے اور اس وقت میں رضوان ہمارے لیے بہترین انتخاب ہوسکتے ہیں‘‘۔

دورہ آسٹریلیا کے لیے قومی ٹیم 30 نومبر کو لاہور سے روانہ ہوگی جب کہ آسٹریلیا میں تین ٹیسٹ میچز پر مشتمل سیریز کھیلی جائے گی۔

واضح رہے کہ پاکستان کرکٹ ٹیم 14 دسمبر کو پرتھ میں آسٹریلیا کے خلاف پہلا ٹیسٹ کھیلے گی جب کہ دوسرا ٹیسٹ 26 سے 30 دسمبر تک میلبرن کرکٹ گراؤنڈ میں کھیلا جائے گا اور تیسرا و آخری ٹیسٹ 3 جنوری 2024 کو سڈنی میں ہوگا۔