بھارتی کرکٹ ٹیم کے ہیڈ کوچ راہول ڈریوڈ نے بھی ورلڈکپ 2023 کے فائنل میں عبرتناک شکست کے بعد ٹیم سے راہیں جدا کرنے کا فیصلہ کرلیا۔

آئی سی سی مینز کرکٹ ورلڈکپ 2023 کے فائنل میں عبرتناک شکست کے بعد بھارتی ٹیم میں ہلچل مچی ہوئی ہے، پہلے بھارتی کپتان روہت شرما کے حوالے سے خبریں زیر گردش تھیں کہ وہ ٹی ٹوئنٹی کرکٹ چھوڑنے کا ارادہ رکھتے ہیں۔

بھارتی میڈیا رپورٹس کے مطابق روہت شرما جلد ٹی ٹوئنٹی انٹرنیشنل کرکٹ سے ریٹائرمنٹ کا اعلان کرسکتے ہیں کیوں کہ بھارتی بورڈ کی جانب سے ٹی ٹوئنٹی میں مسلسل نوجوان کھلاڑیوں کو مواقع فراہم کیے جارہے ہیں، ایسے میں روہت شرما خود کو مختصر فارمیٹ سے الگ کرنا چاہتے ہیں۔

رپورٹ میں بتایا گیا ہے کہ روہت شرما نے بی سی سی آئی کو حالیہ ورلڈکپ سے پہلے ہی اس بارے میں آگاہ کردیا تھا کہ وہ صرف ٹیسٹ اور ون ڈے کرکٹ پر توجہ مرکوز کرنا چاہتے ہیں اور ممکنہ طور پر وہ ورلڈکپ کے فوراً بعد ریٹائرمنٹ کا اعلان کردیں گے۔

تاہم اب بھارتی کرکٹ ٹیم کے ہیڈ کوچ راہول ڈریوڈ کے حوالے سے بھی بھارتی میڈیا کا کہنا ہے کہ ورلڈکپ فائنل ان کا آخری میچ ہوگا اور انہوں نے اپنے کنٹریکٹ میں توسیع نہ لینے کا فیصلہ کیا ہے۔

بھارتی میڈیا کا کہنا ہے کہ راہول ڈریوڈ نے اپنے فیصلے سے متعلق بورڈ کو آگاہ کردیا ہے جب کہ راہول ڈریوڈ کے اس فیصلے کے بعد ممکنہ طور پر بھارتی کرکٹ ٹیم کے نئے ہیڈ کوچ وی وی ایس لکشمن ہوں گے۔

واضح رہے کہ بھارت اور آسٹریلیا کے درمیان ٹی ٹوئنٹی سیریز کا آغاز بدھ سے ہونے جارہا ہے جس میں عبوری ہیڈ کوچ کے فرائض وی وی ایس لکشمن انجام دیں گے۔