پاکستان کے فاسٹ بولر میر حمزہ نے میلبرن میں کھیلے جانے والے دوسرے ٹیسٹ میں آسٹریلوی کھلاڑیوں کی کمزوری کو ڈھونڈ نکالا ہے۔

پاکستان اور آسٹریلیا کی ٹیموں کے درمیان تین ٹیسٹ پر مشتمل سیریز کھیلی جارہی ہے جس کا دوسرا ٹیسٹ میلبرن میں جاری ہے اور تیسرے دن کا کھیل اختتام پذیر ہوگیا ہے۔

دن کے اختتام تک آسٹریلیا نے دوسری اننگز میں 6 وکٹوں کے نقصان پر 187 رنز اسکور کرلیے ہیں جب کہ انہیں پاکستان پر 241 رنز کی برتری حاصل ہے۔

بعد ازاں مچل مارش اور اسٹیو اسمتھ نے ٹیم کو سہارا دیا اور 153 رنز کی شراکت قائم کرکے ٹیم کی پوزیشن بہتر بنادی۔

مچل مارش 96 رنز بناکر آؤٹ ہوئے، اس کے کچھ دیر بعد ہی 187 کے مجموعی اسکور پر اسٹیو اسمتھ بھی 50 رنز بناکر آؤٹ ہوگئے۔

پاکستان کی جانب سے میر حمزہ نے شاندار بولنگ کا مظاہرہ کرتے ہوئے 3 وکٹیں حاصل کیں جب کہ انہوں نے اپنی سوئنگ اور سیون سے بلے بازوں کو خوب پریشان کیا۔

میچ کے بعد میر حمزہ نے اعتماد کا اظہار کرتے ہوئے کہا ’’میں اپنی بنیاد پر رہا جب کہ پچ فاسٹ بولرز کے لیے شاندار تھی اور میں نے اپنی اسکلز کو خوب استعمال کیا‘‘۔

انہوں نے کہا ’’جب کوئی نیا بلے باز پچ پر آتا ہے اور اگر آپ گیند کو دونوں جانب سے سوئنگ کرسکتے ہوں تو یہ ہمارے لیے اچھا موقع ہوتا ہے‘‘۔

یہ بھی پڑھیں: باکسنگ ڈے ٹیسٹ: میر حمزہ اور شاہین کی شاندار بولنگ پر فیلڈرز نے پانی پھیر دیا

ان کا کہنا تھا ’’ٹریوس ہیڈ کے ساتھ بھی ایسا ہی ہوا، جب وہ پچ پر آئے تو انہیں لگا آؤٹ سوئنگ ہوگی جب کہ میں نے انِ سوئنگ کرنے کی کوشش کی‘‘۔

میر حمزہ کہتے ہیں ’’میرے خیال میں ایک بولر اپنی خوبیوں اور مہارتوں کو اچھی طرح سے جانتا ہے، کچھ بولر سیون اور سوئنگ کے لیے مشہور ہیں جب کہ کچھ بولر اپنی تیز رفتاری سے بلے باز کو پریشان کرتے ہیں‘‘۔

انہوں نے مزید کہا کہ میرے خیال میں بلے باز کو پریشان کرنا اہم ہے، چاہے وہ آپ تیز رفتاری سے کریں یا پھر سیون یا سوئنگ سے جب کہ میں اپنی صلاحیتوں کو بخوبی جانتا ہوں اور اسی طرح پرفارم کرنے کی کوشش کرتا ہوں‘‘۔