پی سی بی نے اگلے ماہ مینز اور ویمنز کے چھ ٹی ٹین نمائشی میچز راولپنڈی میں کروانے کا منصوبہ بنایا ہے۔

خبر رساں ادارے کے مطابق پی سی بی ٹی ٹین لیگ کروانے کا ارادہ رکھتا ہے اور اسی سلسلے میں اگلے ماہ راولپنڈی میں چھ نمائشی میچ کروانے پر غور کیا جارہا ہے۔

نمائشی میچ میں غیر ملکی کھلاڑیوں کو بھی مدعو کیا جائے گا جب کہ انگلش کاؤنٹی کلب مڈل سیکس بھی اس میں شراکت دار ہوگا۔

پی سی بی کی مینجمنٹ کمیٹی کے چیئرمین ذکاء اشرف نے حالیہ بیان میں ٹی ٹین لیگ کی خواہش کا اظہار کیا ہے تاہم ذرائع کے مطابق اب اس پر ٹھوس اقدامات شروع کردیے گئے ہیں اور راولپنڈی کو ممکنہ میزبان شہر کے طور پر مختص کیا گیا ہے۔

رپورٹ کے مطابق نیوزی لینڈ کے خلاف سیریز کے بعد میچز کا انعقاد کیا جائے گا تاکہ زیادہ سے زیادہ کھلاڑی دستیاب ہوں اور شائقین کو مصروف رکھا جاسکے۔

نمائشی میچز کے انعقاد کا مقصد عوام کی دلچسپی کا بھی اندازہ لگانا ہے اور ان میچز کو ملنے والی پذیرائی ہی مستقبل کے فیصلوں پر اثر انداز ہوگی۔

رپورٹ میں بتایا گیا ہے کہ اس وقت نمائشی میچز سمیت متعدد تجاویز زیر غور ہیں اور ذکاء اشرف ٹی ٹین لیگ کا کامیابی سے انعقاد کرکے اپنی شناخت چھوڑنا چاہتے ہیں۔

ذکاء اشرف نے اپنی پچھلی مدت کے دوران ہی پی ایس ایل کا پراجیکٹ شروع کیا تھا جو اس وقت تو ناکام ثابت ہوا تاہم ان کے بعد ذمہ داری سنبھالنے والے نجم سیٹھی نے پاکستان سپر لیگ کا انعقاد کیا تھا۔