دبئی: پاکستان نے انڈر 19 ایشیاکپ میں افغانستان کو شکست دے کر لگاتار تیسری فتح حاصل کرلی ہے۔

انڈر 19 ایشیاکپ کا نواں میچ پاکستان اور افغانستان کی ٹیموں کے درمیان دبئی میں کھیلا گیا جس میں پاکستان نے 83 رنز سے کامیابی اپنے نام کی۔

افغانستان نے ٹاس جیت کر فیلڈنگ کا فیصلہ کیا جب کہ پاکستان نے پہلے بیٹنگ کرتے ہوئے 304 رنز کا ہدف دیا۔

پاکستان کی جانب سے اوپنر سے اننگز کا جارحانہ آغاز فراہم کیا، شمائیل حسین 75 اور شاہزیب خان 79 رنز بناکر آؤٹ ہوئے جب کہ ریاض اللہ نے 73 رنز کی اننگز کھیلی۔

افغانستان کی جانب سے بشیر احمد اور فریدون داؤد زئی نے 3،3 کھلاڑیوں کو آؤٹ کیا جب کہ خلیل احمد اور ںصیر خان نے 2،2 وکٹیں حاصل کیں۔

ہدف کے تعاقب میں افغان بلے باز ناکام ثابت ہوئے اور پوری ٹیم 48.4 اوورز میں 220 رنز پر ڈھیر ہوگئی جب کہ وکٹ کیپر نعمان شاہ نے سب سے زیادہ 54 رنز اسکور کیے۔

علاوہ ازیں وفیح اللہ تارا خیل 32، فریدون داؤد زئی 32 اور کپتان نصیر خان نے 26 رنز اسکور کیے جب کہ پاکستان کی جانب سے فاسٹ بولر عبید شاہ اور طیب عارف نے 3،3 وکٹیں حاصل کیں اور خبیب خلیل کے حصے میں دو وکٹیں آئیں۔

واضح رہے کہ افغانستان کے خلاف کامیابی کے بعد پاکستان نے انڈر 19 ایشیاکپ میں لگاتار تیسری کامیابی حاصل کی ہیں جب کہ اس سے قبل پاکستان نے بھارت کو شکست دی تھی۔