سابق کرکٹرز اظہر علی، عاقب جاوید اور مشتاق احمد کو بورڈ میں اہم ذمہ داریاں ملنے کا امکان ہے۔

پاکستان کرکٹ بورڈ نے سابق کرکٹرز اظہر علی، عاقب جاوید اور مشتاق احمد کی مہارت کو اضافی صلاحیتوں میں استعمال کرنے کے لیے انہیں بورڈ میں اہم ذمہ داریاں دینے کا فیصلہ کیا ہے۔

چیئرمین پی سی بی محسن نقوی بورڈ میں تجربہ کار کرکٹرز کو شامل کرنے کے خواہشمند ہیں جب کہ اس سلسلے میں انہوں نے حال ہی میں اظہر علی، عاقب جاوید، مشتاق احمد اور سلیم یوسف سے مشاورت کی ہے۔

عاقب جاوید اس سے قبل نیشنل کرکٹ اکیڈمی میں نوجوان ٹیلنٹ کو فروغ دینے کے لیے اپنی خدمات انجام دے چکے ہیں جس کی تازہ مثال بابر اعظم، شاہین آفریدی اور محمد رضوان جیسے کرکٹرز کی شکل میں ہمارے سامنے موجود ہے۔

علاوہ ازیں عاقب جاوید گراس روٹ ڈویلپمنٹ اور کوچنگ میں وسیع تجربہ رکھتے ہیں جب کہ انہوں نے پی ایس ایل میں بھی ٹیلنٹ کو فروغ دینے کے لیے اہم کردار ادا کیا ہے۔

دوسری جانب اظہر علی جونیئر سطح پر ذمہ داریاں سنبھال سکتے ہیں، جو پاکستان میں ابھرتے ہوئے کرکٹ ٹیلنٹ کی طرف اپنی توجہ مرکوز رکھے گا۔

محسن نقوی نے قومی ٹیم میں اسپن بولرز کو تربیت دینے اور اکیڈمی کے آپریشنز جیسے اہم معاملات پر مشتاق احمد کی مدد حاصل کرنے میں دلچسپی ظاہر کی ہے۔