پاکستان کرکٹ ٹیم کے ہیڈ کوچ جیسن گلیپسی نے اپنا کردار واضح کرتے ہوئے خود کو سلیکشن کے فیصلوں سے دور کردیا۔

پاکستان کی ریڈ بال ٹیم کے ہیڈ کوچ جیسن گلیپسی کا کہنا ہے ’’پی سی بی نے پہلے ٹیسٹ کے بعد فیصلہ کیا کہ ایک نیا سلیکشن پینل بنایا جائے گا اور وہ فیصلے کریں گے جب کہ میں اس فیصلہ سازی میں شامل نہیں تھا‘‘۔

انہوں نے کہا ’’میں اب صرف میچ کی حکمت عملی کا کوچ ہوں، اس لیے اب چیزوں سے دور رہتا ہوں اور صرف کھلاڑٰیوں پر توجہ مرکوز کرتا ہوں اور انہیں کرکٹ کے لیے تیار کرتا ہوں‘‘۔

جیسن گلیسپی مزید کہتے ہیں ’’اب میری ترجیح صرف کھلاڑی ہیں اور سلیکشن کا معاملہ نئی مقرر کردہ کمیٹی پر چھوڑ دیں، ہم صرف بہترین کرکٹ کھیلنے کی کوشش کریں گے‘‘۔

خیال رہے کہ پی سی بی نے حال ہی میں سلیکشن کمیٹی میں تبدیلی کرتے ہوئے سابق فاسٹ بولر عاقب جاوید کی سربراہی میں ایک نیا پانچ رکنی پینل تشکیل دیا ہے۔

سلیکشن کمیٹی میں عاقب جاوید، علیم ڈار، اسد شفیق، اظہر علی اور حسن چیمہ شامل ہیں جب کہ سلیکسن کمیٹی کو پلیئنگ الیون منتخب کرنے کا مکمل اختیار دیا گیا ہے۔

واضح رہے کہ انگلینڈ کے خلاف پہلے ٹیسٹ میں شکست کے بعد سلیکشن کمیٹی نے ٹیم میں اہم تبدیلیاں کی تھیں جس کے نتائج دوسرے ٹیسٹ میں ہمیں جیت کی صورت میں بھی دیکھنے کو ملے۔