ملتان: انگلش کھلاڑی بین اسٹوکس نے پاکستان کے خلاف دوسرے ٹیسٹ میچ کی حکمت عملی بتادی۔

پاکستان اور انگلینڈ کی ٹیموں کے درمیان تین ٹیسٹ میچز پر مشتمل سیریز کھیلی جارہی ہے جس کا دوسرا میچ 15 اکتوبر سے ملتان میں کھیلا جائے گا۔

دوسرے ٹیسٹ کے لیے انگلینڈ ٹیم میں واپسی کرتے ہوئے کپتان بین اسٹوکس نے میڈیا سے گفتگو کرتے ہوئے اپنی حکمت عملی بتادی۔

انگلش کپتان نے کہا کہ امید تو یہی ہے کہ ہم ٹاس جیت کر بیٹنگ کریں جب کہ پہلے ٹیسٹ میں بھی ہماری کوشش تھی کہ پاکستان ٹیم پر دباؤ ڈالا جائے۔

ان کا کہنا تھا کہ کارس نے پچھلے ٹیسٹ میچ میں بہت اچھی بولنگ کی ہے جب کہ شاہین آفریدی اور نسیم شاہ کا ٹیم میں نہ ہونا پاکستان کرکٹ کا معاملہ ہے۔

بین اسٹوکس کہتے ہیں کہ پچ کو دیکھ کر لگ رہا ہے کہ پچ کافی سلو ہوگی لیکن ہم ہمیشہ نتائج حاصل کرنے کی کوشش کرتے ہیں جب کہ ہم پہلے ٹیسٹ میچ میں مختلف پلانز کے ساتھ کھیلے۔

خیال رہے کہ پاکستان کے خلاف دوسرے ٹیسٹ کے لیے انگلینڈ نے پلیئنگ الیون کا اعلان کردیا ہے جس میں دو تبدیلیاں کی گئیں ہیں۔

رس ووکس اور گس ایٹکنسن کی جگہ کپتان بین اسٹوکس اور میتھیو پوٹس کو ٹیم میں شامل کیا گیا ہے۔

علاوہ ازیں انگلش اسکواڈ میں زیک کرالی، بین ڈکٹ، اولی پوپ، جو روٹ، ہیری بروک، بین اسٹوکس، جیمی اسمتھ، برائیڈن کارس، جیک لیچ اور شعیب بشیر شامل ہیں۔