قومی ٹیم کے کپتان محمد رضوان نے ایک میچ میں سب سے زیادہ کیچ پکڑنے کا عالمی ریکارڈ برابر کردیا۔

پاکستان اور آسٹریلیا کی ٹیموں ون ڈے سیریز کا دوسرا میچ ایڈیلیڈ میں کھیلا گیا جس میں کپتان محمد رضوان نے 6 کیچ پکڑ ایک میچ میں سب سے زیادہ کیچ پکڑنے کا عالمی ریکارڈ برابر کیا ہے۔

اس سے قبل  ایڈم گلکرسٹ، مارک باؤچر، ایلک اسٹیورٹ، میٹ پرائیر، جوز بٹلر، سرفراز احمد، کوئنٹن ڈی کک اور میتھیو کراس بھی ایک میچ میں چھ کیچ کرچکے ہیں۔

محمد رضوان اس میچ میں ایک کیچ پکڑنے میں بھی ناکام رہے اگر وہ ایڈم زمپا کا بھی کیچ لے لیتے تو وہ ایک ہی میچ میں سب سے زیادہ کیچ پکڑنے کا نیا عالمی ریکارڈ اپنے نام کرسکتے تھے۔

خیال رہے کہ آسٹریلیا کے خلاف دوسرے میچ میں پاکستان نے 9 وکٹوں سے شاندار کامیابی حاصل کرکے سیریز 1-1 سے برابر کردی ہے۔

پاکستان نے ٹاس جیت کر آسٹریلیا کو بیٹنگ کی دعوت دی تو قومی بولرز نے عمدہ بولنگ کا مظاہرہ کرتے ہوئے آسٹریلیا کی پوری ٹیم 163 رنز پر ہی ڈھیر کردی۔

حارث رؤف نے 5 کھلاڑیوں کو آؤٹ کیا، شاہین آفریدی 3 وکٹیں حاصل کرنے میں کامیاب رہے جب کہ محمد حسنین اور نسیم شاہ کے حصے میں ایک ایک وکٹ آئی۔

جواب میں قومی بولرز کی طرح بلے بازوں نے بھی شاندار بیٹنگ کی صلاحیتوں کو مظاہرہ کیا اور مقررہ ہدف 26.3 اوورز میں ایک وکٹ کے نقصان پر حاصل کرلیا۔

نوجوان کھلاڑی صائم ایوب نے 5 چوکوں اور 6 چھکوں کی مدد سے 82 رنز اسکور کیے جب کہ عبداللہ شفیق 64 اور بابر اعظم نے 15 رنز بنائے۔