ہوبارٹ: تیسرے ٹی ٹوئنٹی میں بھی آسٹریلیا نے پاکستان کو باآسانی 7 وکٹوں سے شکست دے دی۔

پاکستان اور آسٹریلیا کی ٹیموں کے درمیان ٹی ٹوئنٹی سیریز کا تیسرا و آخری میچ ہوبارٹ میں کھیلا گیا جس میں پاکستان نے ٹاس جیت کر بیٹنگ کا فیصلہ کیا۔

قومی بیٹنگ لائن آسٹریلوی بولرز کے سامنے ریت کی دیوار ثابت ہوئی اور پوری ٹیم 18.1 اوورز میں 117 رنز پر ڈھیر ہوگئی جس کے جواب میں آسٹریلیا نے مقررہ ہدف باآسانی 3 وکٹوں کے نقصان پر محض 11.2 اوورز میں حاصل کرلیا۔

پاکستان کی بیٹنگ

پاکستان کی جانب سے بابراعظم 41 اور حسیب اللہ خان 24 رنز کے ساتھ نمایاں رہے جب کہ شاہین آفریدی 16، عرفان خان 10 اور صاحبزادہ فرحان 9 رنز بناکر آؤٹ ہوئے۔

علاوہ ازیں جہانداد خان 5، عثمان خان 3، کپتان سلمان آغا، عباس آفریدی اور صفیان مقیم 1،1 رن بناکر پویلین لوٹ گئے۔

آسٹریلیا کی جانب سے ایرون ہارڈی نے 3 کھلاڑیوں کو آؤٹ کیا جب کہ ایڈم زمپا اور اسپینسر جانسن نے 2، 2 وکٹیں حاصل کیں۔

آسٹریلیا کی بیٹنگ

آسٹریلوی بیٹر مارکوس اسٹونس نے 27 گیندوں پر پانچ چھکوں اور پانچ چوکوں کی بدولت ناقابل شکست 61 رنز بنائے جب کہ جوش انگلس نے 27 اور جیک فراسر نے 18 رنز کی اننگز کھیلی۔

پاکستان کی طرف سے شاہین آفریدی، عباس آفریدی اور جہانداد خان نے ایک، ایک وکٹ حاصل کی۔

پاکستان پلیئنگ الیون

تیسرے ٹی ٹوئنٹی میں پاکستان ٹیم کی قیادت محمد رضوان کی جگہ نائب کپتان سلمان علی آغا نے کی، علاوہ ازیں پلیئنگ الیون میں صاحب زادہ فرحان، بابر اعظم، حسیب اللہ، سلمان علی آغا، عرفان خان نیازی، عباس آفریدی، شاہین شاہ آفریدی، جہانداد خان، حارث رؤف اور سفیان مقیم شامل تھے۔

واضح رہے کہ آسٹریلیا نے ٹی ٹوئنٹی سیریز میں پاکستان کو وائٹ واش کردیا ہے جب کہ آسٹریلیا نے پہلے ٹی ٹوئنٹی 29 اور دوسرے میں 13 رنز سے فتح حاصل کی تھی۔