چیئرمین پاکستان کرکٹ بورڈ (پی سی بی) محسن نقوی نے نیشنل اسٹیڈیم کراچی کا تفصیلی دورہ کیا اور اپ گریڈیشن پراجیکٹ پرپیش رفت کاجائزہ لیا۔

 محسن نقوی کوایف ڈبلیو او کے حکام نے اپ گریڈیشن پراجیکٹ پر ہونے والی پیش رفت کے بارے میں بریفنگ دی، اس موقع پر ڈائریکٹر انفرااسٹرکچر پی سی بی اور مینجرنیشنل  کرکٹ اسٹیڈیم بھی موجود تھے۔

محسن نقوی نے اسٹیل اسٹرکچر پر مشتمل جدید طرز کی خوبصورت ترین عمارت کے چاروں فلورز کی فنشنگ کا بھی مشاہدہ کیا اور ہدایت کی کہ رفتار کے ساتھ اعلیٰ معیار کو یقینی بنایا جائے، اس کے ساتھ ہی نئی بلڈنگ میں انکلوژرز  بنانے کی ہدایت بھی کی۔

محسن نقوی نے کہا کہ نیشنل بینک کرکٹ اسٹیڈیم میں پولز پر نئی ایل ڈی اے لائٹس لگائی جا رہی ہیں، شائقین کرکٹ تاریخ میں پہلی بار منفرد  لیزر لائٹس شو سے بھی محظوظ ہو سکیں گے، جبکہ شائقین کرکٹ کی سہولت کیلئے پارکنگ ایریا کو اسٹیڈیم کے قریب کرنے کی بھی ہدایت کی۔

  چئیرمین پی سی بی کی ہدایت پر دونوں اسکور اسکرینز کو اب نشتوں سے اونچائی  پر نصب کیا جائے گا، اسکرینز  اونچائی پر نصب ہونے سے شائقین کو میچ دیکھنے میں  کسی قسم کی دقت  کا سامنا نہیں کرنا پڑے گا۔

محسن نقوی نے یہ بھی کہا کہ گراؤنڈ اور نشتوں کے درمیان خندق بنانے کا جائزہ لیا جائے، جبکہ چیمپئنز ٹرافی سے پہلے اپ گریڈیشن پراجیکٹ کی تکمیل کے لیے مزید محنت سے کام جاری رکھا جائے۔

 چئیرمین پی سی بی نے کہا کہ چیمپئنز ٹرافی ٹورنامنٹ کے انعقاد کے لیے تیاریاں مکمل ہیں، جبکہ پاکستان کے ساتھ بیرون ممالک سے آنے والے شائقین کرکٹ اس بار پہلے سے زیادہ سہولتوں کے ساتھ میچ دیکھیں گے۔

چئیرمین پی سی بی محسن نقوی نے ایف ڈبلیو او کے حکام کو پراجیکٹ کی بروقت تکمیل کے لیے ہدایات دیں۔