پاکستان کے نوجوان جارح مزاج بلے باز صائم ایوب نے جلد صحتیاب ہونے کے لیے عزم کا اظہار کرتے ہوئے قوم سے دعا کی اپیل کردی۔

لندن میں زیر علاج اوپننگ بلے باز صائم ایوب نے جلد صحت یاب ہونے کے عزم کا اظہار کرتے ہوئے کہا ’’مجھے نہیں معلوم کہ مکمل صحت یاب ہونے میں کتنا وقت لگے گا لیکن میں اپنی پوری کوشش کر رہا ہوں‘‘۔

انہوں نے بتایا ’’ڈاکٹرز بھی میری جلد صحتیابی کے لیے پوری کوشش کررہے ہیں جب کہ قوم سے درخواست ہے کہ وہ میری مکمل اور جلد صحت یابی کے لیے دعا کریں‘‘۔

ٹیم کو ان سے توقعات کے حوالے سے سوال پر انہوں نے کہا ’’کوئی ایک کھلاڑی اہم نہیں ہوتا بلکہ جیتنے کے لیے پوری ٹیم کو مل کر کام کرنے کی ضرورت ہوتی ہے‘‘۔

خیال رہے کہ صائم ایوب جنوبی افریقہ کے خلاف دوسرے ٹیسٹ کے دوران دائیں ٹخنے میں فریکچر کے باعث انجری کا شکار ہوئے تھے جس کے بعد علاج کے لیے انہیں اظہر محمود کے ہمراہ لندن روانہ کیا گیا تھا۔

پی سی بی نے تاحال چیمپئنز ٹرافی میں ان کی شرکت کے حوالے سے تصدیق نہیں کی ہے تاہم ان کی جلد صحت یابی کے لیے کڑی نظر رکھی جارہی ہے۔

واضح رہے کہ نوجوان اوپنر نے حال ہی میں عمدہ کارکردگی کا مظاہرہ کرتے ہوئے تین ون ڈے میچز میں سنچریاں اور ایک ٹی ٹوئنٹی میچ میں ناقابل شکست 98 رنز کی اننگز کھیلی تھی جب کہ انہیں پلیئر آف دی سیریز کا اعزاز بھی حاصل ہوا تھا۔