پاکستان کرکٹ بورڈ (پی سی بی) نے سہ ملکی ون ڈے سیریز کا شیڈول جاری کردیا۔

نئی شکل کے ساتھ  قذافی اسٹیڈیم  پاکستان نیوزی لینڈ  اور جنوبی افریقہ کے میچوں کی میزبانی کرے گا، جبکہ  اپ گریڈ  نیشنل بینک اسٹیڈیم میں پاکستان اور جنوبی افریقہ کے میچ کے علاوہ   فائنل بھی کھیلا جائے گا۔

پہلا میچ 8 فروری کو پاکستان اور نیوزی لینڈ کے درمیان قذافی اسٹیڈیم لاہور میں ہوگا، جبکہ دوسرا میچ 10فروری کو نیوزی لینڈ اور جنوبی افریقہ کے درمیان قذافی اسٹیڈیم لاہور میں ہوگا۔

نیشنل بینک اسٹیڈیم کراچی 12 فروری کو پاکستان اور جنوبی افریقہ کے میچ کے علاوہ14 فروری کو فائنل کی میزبانی بھی کرے گا۔

قذافی اسٹیڈیم اور نیشنل بینک اسٹیڈیم میں ہونے والے چار میچ تینوں فریقوں کو آئی سی سی چیمپئنز ٹرافی کی تیاریوں کو حتمی شکل دینے کا بہترین موقع فراہم کریں گے۔

 پی سی بی کے لیے اپنے نئے ڈیزائن اور دوبارہ تیار کردہ اسٹیڈیمز کو عالمی معیار کی نشریات کے ذریعے دنیا کے سامنے دکھانے کا یہ بہترین موقع  ہے۔

قذافی اسٹیڈیم میں تماشائیوں کی گنجائش بڑھا دی گئی ہے، جبکہ نشریاتی معیار  کو بڑھانے کے لیے 480 جدید ترین ایل ای ڈی لائٹس نصب کی گئیں ہیں، اس کے علاوہ  دو بڑی ڈیجیٹل ری پلے اسکرینز بھی نصب کی گئی ہیں۔

کھلاڑیوں اور آفیشلز کے لیے  نیا ہاسپٹلیٹی انکلوژر تکمیل کے قریب ہے، نیشنل بینک اسٹیڈیم  میں یونیورسٹی اینڈ پر کھلاڑیوں اور آفیشلز کے لیے ایک نیا ہاسپٹلیٹی انکلوژر بھی بنایا گیا ہے، جبکہ براڈکاسٹ کوریج کو بہتر بنانے کے لیے 350 ایل ای ڈی لائٹس لگائی گئی ہیں۔