ملتان: اسپنر ساجد خان نے وائٹ بال کرکٹ میں بھی قومی ٹیم کی نمائندگی کی خواہش ظاہر کردی ہے۔

قومی ٹیسٹ ٹیم کے اسپنر ساجد خان نے ملتان ٹیسٹ کے دوسرے روز کے کھیل کے اختتام پر پریس کانفرس کرتے ہوئے کہا کہ جس ملک میں بھی جائیں کھیلنا چاہتا ہوں، سلیکٹرز کھلائیں یا نہ کھلائیں یہ ان کا کام ہے۔

اسپنر نے کہا کہ جب بھی موقع ملتا ہے تو فوکس یہی رہتا ہے کہ اپنی ٹیم اور ملک کے لئے  پرفارم کروں، ابتداء میں بیٹسمین تھا لیکن بعد میں اسپن بولنگ شروع کی۔

سلیبریشن کے منفرد انداز پر بات کرتے ہوئے انہوں نے بتایا کہ ویسٹ انڈیز کے اسپنر نے کہا کہ آپ کو آؤٹ کرنے کے بعد آپ کی سلبریشن کروں گا جب کہ میں کسی کو منع نہیں کرتا اور اچھا لگا کہ اس نے میرا انداز اپنایا۔

ساجد خان کا کہنا تھا کہ میرے سلیبریش کے انداز کو بچے بھی کاپی کرتے ہیں جب کہ کامران غلام  بھی وہی انداز اپناتے ہیں۔ میرا ارمان ہے کہ اگلی اننگز میں پانچ آؤٹ کروں تو بابراعظم اور رضوان سے بھی سلیبریشن کا انداز کرواؤں۔

انہوں نے خواہش کا اظہار کرتے ہوئے کہا کہ جب مجھے رنز پڑے تو عاقب جاوید نے دوستانہ ماحول میں کہا کہ وہ بھی کھیلنے آئے ہیں، اگر وائٹ بال میں آؤں گا تو پھر نئی چیزوں کی کوشش کروں گا جب کہ میری خواہش ہے کہ وائٹ بال میں بھی پاکستان کی نمائندگی کروں۔

قومی اسپنر نے بتایا کہ ابھی ٹی ٹین میں بھی نام آیا تھا مگر بدقسمتی سے سیریز آگئی اور نہیں کھیل سکا۔ ہر کھلاڑی کی خواہش ہے کہ وہ دنیا کی ہر لیگ کھیلے مگر مجھے ابھی موقع نہیں مل رہا جب کہ ہماری برانڈ کرکٹ پی ایس ایل میں بھی مجھے کوئی فرنچائز نہیں لے رہی۔

ان کا مزید کہنا تھا کہ اگر اسپنرز کو موقع دیں اور چاہے ٹیم میں نہ کھلائیں مگر انہیں ٹیم کے ساتھ رکھیں گے تو ہی نئے اسپنرز آئیں گے۔

یاد رہے کہ پاکستان اور ویسٹ انڈیز کے درمیان ملتان میں پہلا ٹیسٹ میچ جاری ہے جس کی پہلی اننگز میں پاکستان نے 230 رنز بنائے تھے جب کہ ساجد خان اور نعمان علی کی تباہ کن بولنگ کی بدولت ویسٹ انڈیز کی ٹیم پہلی اننگز میں 137 پر ہی ڈھیر ہوگئی۔

اسپنر ساجد خان نے 4 کھلاڑیوں کا شکار کیا جب کہ نعمان علی نے 5 کھلاڑیوں کو آؤٹ کیا اور ایک وکٹ ابرار احمد کے حصے میں آئی۔