برٹش جونیئر اوپن اسکواش چیمپئن شپ جیتنے والے قومی ہیرو سہیل عدنان وطن واپس پہنچ گئے۔

لاہور ایئرپورٹ پر سیکرٹری داخلہ پنجاب و چیئرمین پنجاب سکواش ایسوسی ایشن نور الامین مینگل سمیت اعلیٰ عہدیداران اور عوام کی بڑی تعداد نے چیمپئن کا شاندار استقبال کیا۔

پنجاب سکواش کمپلیکس میں سہیل عدنان کے اعزاز میں ایک خصوصی تقریب منعقد کی گئی جس میں ان کے والدین، اہل خانہ، کوچز اور اسکواش ایسوسی ایشن کے عہدیداران نے شرکت کی۔

تقریب کے دوران پاکستان زندہ باد کے نعرے گونج اٹھے اور قومی چیمپئن کو زبردست خراج تحسین پیش کیا گیا۔

تقریب میں سیکرٹری پاکستان سکواش ائیر کموڈور (ریٹائرڈ) عامر نواز، ڈائریکٹر اکیڈیمکس عرفان اصغر، ڈائریکٹر سپورٹس پنجاب، سینیئر نائب صدر سہیل خان، نائب صدر محمد منصور، اور ڈائریکٹر پنجاب سکواش مامون خان نے شرکت کی اور سہیل عدنان کی شاندار کارکردگی کو سراہا۔

تقریب سے خطاب کرتے ہوئے سہیل عدنان نے کہا کہ ٹف میچز کھیل کر مزہ آیا اور جیت کر بہت خوشی ہے۔ میں 18 سال بعد چیمپئن شپ جیت کر پاکستان کے نام کرتا ہوں۔ انہوں نے والدین، کوچز اور سپورٹس ایسوسی ایشن کا خصوصی شکریہ ادا کرتے ہوئے کہا کہ وہ مستقبل میں مزید محنت کر کے پاکستان کے لیے مزید اعزازات حاصل کرنا چاہتے ہیں۔

سیکرٹری داخلہ پنجاب نور الامین مینگل نے کہا کہ سہیل عدنان نے ایک بڑا کارنامہ سر انجام دیا ہے۔ برٹش جونیئر اوپن جیتنا کسی ورلڈ چیمپئن شپ سے کم نہیں۔

انہوں نے مزید کہا کہ دنیا کے ایک ہزار بہترین کھلاڑیوں میں سے سہیل عدنان کا اول پوزیشن حاصل کرنا پاکستان کے لیے ایک عظیم اعزاز ہے۔

نور الامین مینگل نے کہا کہ “جہانگیر خان اور جان شیر خان کے بعد سہیل عدنان جیسے نوجوان کھلاڑی پاکستان کا نام روشن کر رہے ہیں۔” چیمپئن کے والدین نے بھی خوشی کا اظہار کرتے ہوئے کہا کہ ان کے چاروں بچے سکواش کھیل رہے ہیں اور مستقبل میں ملک کا نام مزید روشن کریں گے۔

صدر پنجاب سکواش ایسوسی ایشن نے کہا کہ ایسوسی ایشن 10 سے 13 سال کے کھلاڑیوں پر خصوصی توجہ دے رہی ہے اور نوجوان کھلاڑیوں کو تربیت اور مالی معاونت فراہم کر رہی ہے تاکہ مزید عالمی سطح کے کھلاڑی تیار کیے جا سکیں۔