چیئرمین پاکستان کرکٹ بورڈ (پی سی بی) محسن نقوی نے ہیڈ کوچ، ٹیسٹ ٹیم کے کپتان اور سلیکشن کمیٹی کے ہمراہ قذافی اسٹیڈیم کا تفصیلی دورہ کیا۔

اس دورے کے دوران عاقب جاوید، شان مسعود، وہاب ریاض، اظہر علی، علیم ڈار اور اسد شفیق نے اسٹیڈیم کی برق رفتاری سے مکمل ہونے والی تکمیل کی تعریف کی۔

محسن نقوی نے نئی آرام نشستوں کا معائنہ کیا اور انکلوژر کی آخری نشستوں پر گئے جہاں انہوں نے گراؤنڈ کا بہترین ویو دیکھا۔ انہوں نے ہیڈ کوچ، ٹیسٹ ٹیم کے کپتان اور سلیکشن کمیٹی کے ہمراہ مین بلڈنگ اور ڈریسنگ رومز کا بھی معائنہ کیا۔

عاقب جاوید نے اسٹیڈیم کے اعلیٰ معیار کے کام کی تعریف کرتے ہوئے کہا کہ غیر معمولی رفتار سے اسٹیڈیم کا کام مکمل کیا گیا ہے، اور یہ ایک قابل فخر کامیابی ہے۔ شان مسعود نے قذافی اسٹیڈیم کی نئی شکل پر خوشی کا اظہار کرتے ہوئے کہا کہ یہ اسٹیڈیم انتہائی مختصر مدت میں مکمل طور پر نیا اور جدید بن چکا ہے۔

وہاب ریاض نے شائقین کرکٹ کے لیے سٹیڈیم کی جدید سہولتوں کا ذکر کرتے ہوئے کہاکہ اب شائقین کے لیے میچ کا ویو بہتر ہو گیا ہے، جو کھیل کے تجربے کو مزید دلکش بناتا ہے۔

سلیکشن کمیٹی نے بھی اسٹیڈیم میں ہونے والی تبدیلیوں پر حیرانی کا اظہار کرتے ہوئے کہا کہ یقین نہیں آ رہا کہ یہ وہی قذافی اسٹیڈیم ہے، جو پہلے تھا۔

اس موقع پر ایڈوائزر عامر میر، چیف آپریٹنگ آفیسر سمیر احمد، ڈائریکٹر انفراسٹرکچر ایف ڈبلیو او کے پراجیکٹ ڈائریکٹر، کنٹریکٹر اور نیسپاک کے اعلی حکام بھی موجود تھے، جنہوں نے اسٹیڈیم کی تعمیر میں اہم کردار ادا کیا۔