قومی اسپنر نعمان علی نے ٹیسٹ کرکٹ میں ویسٹ انڈیز کے خلاف ہیٹرک کرکے تاریخ رقم کردی۔

نعمان علی ٹیسٹ کرکٹ میں ہیٹرک کرنے والے پہلے پاکستانی اسپنر بن گئے ہیں، انہوں نے یہ کارنامہ ویسٹ انڈیز کے خلاف دوسرے ٹیسٹ کے پہلے دن کے کھیل میں انجام دیا۔

نعمان علی نے 12 ویں اوور میں کیون سنکلیئر کو آؤٹ کرکے اپنی ہیٹرک مکمل کی جب کہ ان کی تباہ کن بولنگ کے باعث ویسٹ انڈٰیز کے صرف 76 رنز پر ہی 8 کھلاڑی آؤٹ ہوچکے تھے، نعمان علی نے اس اننگز میں مجموعی طور پر 6 وکٹیں حاصل کیں۔

اس کامیابی کے ساتھ ہی نعمان علی ٹیسٹ کرکٹ میں ہیٹ ٹرک کرنے والے پاکستانی کرکٹرز کی ایلیٹ لسٹ میں شامل ہوگئے ہیں۔

اس سنگ میل کو عبور کرنے والے وہ پانچویں کھلاڑٰی ہیں جب کہ اس سے قبل ٹیسٹ کرکٹ میں یہ کارنامہ نسیم شاہ، محمد سمیع، عبدالرزاق اور وسیم اکرم انجام دے چکے ہیں۔

نسیم شاہ نے 2020 میں بنگلادیش کے خلاف راولپنڈٰی ٹیسٹ میں یہ کارنامہ انجام دیا تھا جب کہ محمد سمیع نے 2002 میں سری لنکا کے خلاف لاہور کے قذافی اسٹیڈیم میں ہیٹرک کی تھی۔

عبدالرزاق 2000 میں سری لنکا کے خلاف گال ٹیسٹ میں ہیٹرک کرنے میں کامیاب رہے تھے جب کہ وسیم اکرم ٹیسٹ کرکٹ میں دو مرتبہ ہیٹرک کرنے والے واحد کھلاڑی ہیں۔

سوئنگ کے سلطان نے 1999 میں سری لنکا کے خلاف لاہور اور ڈھاکہ میں دونوں ہیٹرک کی تھیں۔