پاکستان کے تجربہ کار بیٹر فخرزمان کی آئی سی سی چیمپئنز ٹرافی کے لیے قومی ٹیم میں واپسی متوقع ہے۔

آئی سی سی چئمپئنز ٹرافی کا انعقاد 19 فروری سے 9 مارچ کے دوران پاکستان اور متحدہ عرب امارات میں ہوگا جس کے لیے تیاریاں مکمل کرلی گئیں ہیں۔

رپورٹ کے مطابق چیمپئنز ٹرافی کے لئے قومی ٹیم میں سات بلے باز، چار فاسٹ بولر، تین اسپنرز اور ایک وکٹ کیپر کو رکھا جائے گا۔

34 سالہ تجربہ کار بیٹر فخرزمان 82 ون ڈے میچز میں قومی ٹیم کی نمائندگی کرچکے ہیں جب کہ وہ ٹیم میں اہم کھلاڑی بھی سمجھے جاتے ہیں۔

فخرزمان کو دورہ آسٹریلیا، زمبابوے اور جنوبی افریقہ کے لیے ٹیم کا حصہ نہیں بنایا گیا تھا تاہم چیمپئنز ٹی ٹوئنٹی کپ میں ان کی حالیہ کارکردگی کی بدولت چیمپئنز ٹرافی کے لیے ان کی قومی ٹیم میں واپسی کا امکان ہے۔

قومی بیٹر نے چیمپئنز ٹی ٹوئنٹی کپ کے دس میچز میں 30.30 کی اوسط سے 303 رنز بنائے تھے جس میں ان کی دو نصف سنچریاں بھی شامل ہیں۔

حالیہ انٹرویو کے دوران انہوں نے بابر اعظم کی حمایت میں کیے گئے ٹوئٹ پر بھی وضاحت پیش کرتے ہوئے کہا کہ میری ٹوئٹ کا غلط مطلب لیا گیا۔

انہوں نے کہا ’’بہتر ہوتا اگر میں ٹوئٹ نہ کرتا کیونکہ لوگوں نے میری ٹوئٹ کا مطلب بورڈ پر تنقید سمجھا جب کہ یہ بات 100 فیصد غلط ہے اور میرا ایسا کوئی مطلب نہیں تھا‘‘۔

ان کا کہنا تھا ’’میری ٹوئٹ کا مقصد صحافیوں اور سابق کرکٹرز کے لیے تھا جنہوں نے بابر اعظم کو ٹیم سے ڈراپ کرنے کا مشورہ دیا تھا‘‘۔