کیپ ٹاؤن: جنوبی افریقہ کی ٹیم دوسرے ٹیسٹ کی پہلی اننگز میں 615 رنز کا پہاڑ کھڑا کرکے آل آؤٹ ہوگئی۔

پاکستان اور جنوبی افریقہ کی ٹیموں کے درمیان دوسرا ٹیسٹ میچ کیپ ٹاؤن کے نیو لینڈز اسٹیڈیم میں جاری ہے جس میں جنوبی افریقہ نے ٹاس جیت کر بیٹنگ کا فیصلہ کیا۔

پہلا دن

جنوبی افریقی اوپنرز نے پہلی وکٹ کی شراکت میں ٹیم کو 61 رنز کا جارحانہ آغاز فراہم کیا تاہم ایڈن مارکرم 17 رنز کے مہمان ثابت ہوئے جب کہ ویان مولڈر 5، ٹرسٹن اسٹبس صفر پر پویلین روانہ ہوئے۔

بعد ازاں ریان رکیلٹن اور کپتان ٹمبا باوما نے ذمہ دارانہ بیٹنگ کا مظاہرہ کرتے ہوئے ٹیم کو سنبھالا اور اسکور کو 307 رنز تک پہنچایا جس کے بعد ٹمبا باوما 106 کی عمدہ اننگز کھیل کر آؤٹ ہوگئے۔

جنوبی افریقہ نے پہلے دن کے کھیل کے اختتام تک 4 وکٹوں کے نقصان پر 316 رنز اسکور کیے تھے۔

دوسرا دن

دوسرے دن کے کھیل کا آغاز پاکستان کے لیے فائدہ مند ثابت ہوا اور محمد عباس نے ڈیوڈ بیڈنگھم کو 5 رنز پر آؤٹ کردیا لیکن پھر کائل ویرین نے ریان رکیلٹن کا ساتھ دیا اور سنچری کے بعد وہ آغا سلمان کی گیند کا شکار ہوئے۔

آخرکار ریان رکلیلٹن کی بھی اننگز کا اختتام ہوا جو 259 رنز بنانے کے بعد میر حمزہ کی گیند پر محمد عباس کو کیچ دے بیٹھے جب کہ مارکو جانسن 62، کیشو مہاراج 40 اور کوئینا مافاقا صفر پر آؤٹ ہوئے۔

پاکستان کی جانب سے سلمان آغا اور محمد عباس نے تین تین شکار کیے جب کہ میر حمزہ اور خرم شہزاد نے دو دو وکٹیں حاصل کیں۔