آئی سی سی چیمپئنز ٹرافی 2025 کے تحت کل دبئی میں پاکستان اور بھارت کے درمیان کرکٹ کا شاندار مقابلہ ہوگا۔

اس میچ کو لے کر پاکستان کے مختلف حلقوں میں جوش و خروش پایا جا رہا ہے، اور سندھ حکومت کی ترجمان و ایم پی اے سعدیہ جاوید نے پاکستانی ٹیم کے لئے نیک خواہشات کا اظہار کیا ہے۔

سعدیہ جاوید نے اپنے بیان میں کہا میری دعائیں پاکستانی ٹیم کے ساتھ ہیں، اور مجھے امید ہے کہ کل ہمیں ایک اچھی اور نڈر کرکٹ دیکھنے کو ملے گی۔

انہوں نے مزید کہا کہ ہمارے کھلاڑی نیوزیلینڈ کے خلاف شکست کو بھول کر جیت کے جذبے سے میدان میں اتریں گے۔

ترجمان سندھ حکومت نے پاکستان ٹیم کی کامیابی کے حوالے سے پرامید ہوتے ہوئے کہا کہ انشا اللہ پاکستان ٹیم اپنی روایتی حریف بھارت کو شکست کا مزا چکھائے گی۔

انہوں نے یہ بھی کہا کہ مجھ سمیت پوری قوم ٹیم پاکستان کی جیت کے لیے دعا گو ہے۔

سعدیہ جاوید نے اس موقع پر کہا کہ پاکستان 29 سال بعد آئی سی سی کے میگا ایونٹ کی میزبانی کر رہا ہے، جس سے کرکٹ کی دنیا میں پاکستان کی اہمیت اور کرکٹ کے حوالے سے اس کی کامیابیوں کی عکاسی ہوتی ہے۔

ترجمان سندھ حکومت سعدیہ جاوید کا مزید کہنا تھا کہ سندھ حکومت نے کراچی میں ہونے والے میچز کی سکیورٹی کے لیے غیر معمولی اقدامات اٹھائے ہیں تاکہ شائقین کرکٹ کا تحفظ یقینی بنایا جا سکے اور میچ کا ماحول پرامن رہے۔