پاکستان کرکٹ بورڈ (پی سی بی) کے چیئرمین محسن نقوی نے نیشنل اسٹیڈیم کی تزئین و آرائش اور مستقبل کے منصوبوں کے حوالے سے میڈیا سے گفتگو کی۔

 انہوں نے کہا کہ اللہ کا شکر ہے کہ آج کراچی والوں سے کیا ہوا وعدہ پورا کیا، اور آپ نے خود فرق دیکھ لیا ہوگا کہ اسٹیڈیم میں تبدیلیاں آ چکی ہیں۔

محسن نقوی نے اسٹیڈیم کی حالت کا ذکر کرتے ہوئے کہا کہ یہاں پر واش روم تک نہیں تھے اور کرسیاں خراب تھیں، لیکن اب آپ دیکھ سکتے ہیں کہ اسٹیڈیم لاہور کے معیار کے قریب ہو چکا ہے۔

انہوں نے مزید کہا کہ جس جس کو اس اسٹیڈیم کی تعمیر پر اعتراض تھا، ان کو آج جواب مل گیا ہے۔

چیئرمین پی سی بی نے اس بات کا اعتراف کیا کہ ہم اسٹیڈیم کے حوالے سے بہت پیچھے تھے، لیکن اب ہم سب سے آگے ہیں۔

انہوں نے اس بات کا بھی ذکر کیا کہ نیشنل اسٹیڈیم میں ابھی کافی کام باقی ہے، لیکن ہم نے افتتاحی تقریب میں سب کو مدعو کیا تھا۔”

محسن نقوی نے سندھ حکومت سے بات چیت کے حوالے سے کہا کہ ہم نے حیدرآباد اور سکھر میں بھی اسٹیڈیم بنانے کی بات کی ہے، اور وزیراعظم نے مظفرآباد کا اسٹیڈیم بنانے کا بھی کہا ہے۔

چیئرمین پی سی بی نے کرکٹ کے ترقیاتی منصوبوں پر بات کرتے ہوئے کہا کہ اچھے اسٹیڈیم ڈومیسٹک کرکٹ کے لیے بہت ضروری ہیں، اور میں نجی کمپنیوں کو دعوت دے رہا ہوں کہ ہمارے ساتھ مل کر کام کریں۔

انہوں نے پی ایس ایل کے حوالے سے کہا کہ اس بار ہم پی ایس ایل کو نئے رنگ کے ساتھ کریں گے، اور اس میں کوئی کمیاب تبدیلیاں ہوں گی۔

سابق چیئرمین پی سی بی کے حوالے سے بات کرتے ہوئے محسن نقوی نے کہا کہ سارے سابق چیئرمین میرے ساتھی ہیں، اور میں ان کی عزت کرتا ہوں۔

آخر میں، بھارت کے خلاف میچ پر تبصرہ کرتے ہوئے انہوں نے کہا کہ میں نے ٹیم کو کوئی پیغام نہیں دیا، بس یہی کہا کہ اچھا کھیلیں، ہار جیت کی پرواہ نہیں۔