انجری کے باعث اوپنر فخرزمان چیمپئنز ٹرافی کے اسکواڈ سے باہر ہوگئے ہیں۔

فخر زمان انجری کے باعث چیمپئنز ٹرافی 2025 کے لئے قومی اسکواڈ سے باہر ہوگئے ہیں جب کہ امام الحق کو فخر زمان کی جگہ قومی اسکواڈ میں شامل کیا گیا ہے۔

آئی سی سی کی منظوری کے بعد امام الحق پاکستان ٹیم کا حصہ بن گئے ہیں جب کہ آئی سی سی ایونٹ ٹیکنیکل کمیٹی نے امام الحق کی شمولیت کی منظوری دے دی ہے۔

اس موقع پر فخرزمان کا کہنا تھا کہ پاکستان کی نمائندگی کرنا ہر کرکٹر کا اعزاز اور خواب ہے اور فخر کے ساتھ پاکستان کی نمائندگی کرنے کا اعزاز حاصل ہوا ہے۔

انہوں نے کہا کہ بدقسمتی سے میں اب چیمپئنز ٹرافی 2025 سے باہر ہوں، یقیناً اللہ بہترین منصوبہ ساز ہے۔

یاد رہے کہ گزشتہ روز فخر زمان نیوزی لینڈ کے خلاف فیلڈنگ کے دوران پٹھوں میں کھچاؤ کے باعث ان فٹ ہوگئے تھے اور تکلیف کے باعث انہیں میدان سے باہر جانا پڑا تھا۔

ابتدائی اوورز میں فیلڈنگ کے دوران گراؤنڈ سے باہر جانے کے باعث آئی سی سی رولز کے تحت نیوزی لینڈ کے خلاف فخرزمان اوپننگ بھی نہیں کر سکے تھے۔

بعد ازں بابر اعظم نے سعود شکیل کے ساتھ اننگز کا آغاز کیا اور فخر زمان چوتھے نمبر پر کھیلنے آئے لیکن پوری اننگز میں وہ تکلیف کا شکار رہے جب کہ 24 رنز بناکر وہ آؤٹ ہوگئے۔

واضح رہے کہ آئی سی سی چیمپئنز ٹرافی میں پاکستان اپنا اگلا میچ 23 فروری کو بھارت کے خلاف کھیلا گا جو کہ دبئی میں شیڈول ہے جس کے لیے پاکستان ٹیم آج روانہ ہوگی۔