دبئی میں کھیلے گئے چیمپئنز ٹرافی 2025 کے پہلے سیمی فائنل میں بھارت نے آسٹریلیا کو 4 وکٹوں سے شکست دے کر فائنل کا ٹکٹ کٹوا لیا۔

دبئی کرکٹ اسٹیڈیم میں کھیلے جانے والے اس سیمی فائنل میں بھارت نے آسٹریلیا کا 264 رنز کا ہدف 6 وکٹوں کے نقصان پر 48.1 اوورز میں حاصل کر کے کینگروز سے ورلڈ کپ فائنل کا بدلہ لے لیا۔

بھارت کے جانب سے ایک بار پھر ویرات کوہلی نے مرد بحران کا کردار ادا کیا اور اور 98 گیندوں پر 94 رنز کی شاندار اننگز کھیل کر سب سے نمایاں رہے۔

کپتان روہت شرما 28 رنز بنا کر آؤٹ ہوئے، جبکہ شبھمن گل نے 8 رنز بنائے۔

شریاس ایئر 45، اکشر پٹیل 27 اور ہاردیک پانڈیا 28 رنز بنا کر آؤٹ ہوئے، جبکہ کے ایل راہول نے ناقابل شکست 42 رنز بنائے۔

آسٹریلیا کی جانب سے ایڈم زمپا اور ناتھن ایلس نے 2،2 کھلاڑیوں کو آؤٹ کیا جبکہ کوپر کونولی اور بین ڈارشس نے ایک ایک وکٹ حاصل کی۔

اس سے قبل آسٹریلیا نے ٹاس جیت کر بیٹنگ کا فیصلہ کیا ہے جب کہ ایونٹ کے ناک آؤٹ مقابلے میں آسٹریلیا کی ٹیم 50 ویں اوور میں 264 رنز بنا کر آؤٹ ہوگئی۔

آسٹریلیا کی پہلی وکٹ صرف 4 رنز کے مجموعی اسکور پر گری جب اوپننگ بلے باز کوپر کونولی بغیر کوئی رن بنائے پویلین لوٹ گئے۔

کینگروز کو دوسرا نقصان 54 رنز کے مجموعی اسکور پر اٹھانا پڑا جب جارح مزاج بلے باز ٹریوس ہیڈ 39 رنز بناکر آؤٹ ہوگئے۔

آسٹریلیا کی تیسری اور چوتھی وکٹ بالترتیب 110 اور 144 رنز کے مجموعی اسکور پر گری، مارنس لیبوشگن 29 رنز اور جوش انگلس 11 رنز بناکر ہمت ہار گئے۔

پانچویں اور چھٹی وکٹ بالترتیب 198 اور 205 کے مجموعی اسکور پر گری۔ کپتان اسٹیون اسمتھ 73 اور گلین میکسویل 7 رنز بناکر آؤٹ ہوگئے۔

بھارت کی جانب سے روندرا جڈیجا اور محمد شامی نے 2، 2، ورون چکرورتھی اور اکشر پٹیل نے ایک، ایک وکٹ حاصل کی۔