اگر دو نسلوں کو کرکٹ کے میدان میں ایسے ملک میں دیکھنا پڑے جو ان کا وطن ہے اور نہ آبائی ملک تو خوشگوار حیرت ہوتی ہے۔ پاکستان اور نیوزی لینڈ کے درمیان رواں سیریز کے پہلے ایک روزہ میچ میں اس وقت پاکستانیوں کے سر فخر سے بلند ہوگئے جب ایک پاکستان میں پیدا ہونے والے کھلاڑی کو نیوزی لینڈ کی طرف سے کھیلنے کا موقع ملا۔

لاہور میں 2003 میں پیدا ہونے والے محمد عباس نے اپنے آبائی ملک کی ٹیم کے خلاف نیوزی لینڈ کی طرف سے میکلین گراؤنڈ نیپئیر میں اپنے کیریئر کا آغاز کیا۔  یہ لمحہ جتنا عباس کے خاندان کے لیے فخریہ تھا اتنا ہی تمام پاکستانیوں کے لیے جنہوں نے سوشل میڈیا کے ذریعہ اپنی خوشی کا والہانہ اظہار کیا۔

 اس لمحے کو اگرچہ سب نے انجوائے کیا لیکن گراؤنڈ میں موجود ان کے والدین کے لیے سب سے خوبصورت لمحہ تھا۔  ان کے والد نے اس موقع پر اپنے جذبات کا اظہار کرتے ہوئے کہا کہ اس سے زیادہ خوشی کی کوئی اور بات نہیں ہوسکتی کہ محمد عباس کو آج محنت کا پھل مل رہا ہے،  نیوزی لینڈ کرکٹ بورڈ نے بھی اس لمحے کو اپنے سوشل میڈیا اکاؤنٹ پر نمایاں کیا۔  دوسری طرف نیپئر اسٹیڈیم میں ہزاروں تماشائیوں نے بھی دل کھول کر داد دی۔

محمد عباس کے والد اظہر عباس کون ہیں

خانیوال پنجاب سے تعلق رکھنے والے اظہر عباس ہراج اپنے دور کے ایک جانے پہچانے کرکٹر تھے۔ ایک کسان فیملی میں آنکھ کھولنے کے بعد وہ تعلیم کی غرض سے لاہور شفٹ ہوگئے جہاں انہوں نے عمران خان کو دیکھ کر کرکٹ سیکھی۔  عمران خان ان کے آئیڈیل تھے جس کے باعث وہ بھی فاسٹ بولر بن گئے۔ انہوں نے کلب کرکٹ سے اپنی پہچان بنائی اور پھر پشاور ، ریلویز اور زرعی ترقیاتی بینک کی جانب سے فرسٹ کلاس کرکٹ کھیلی  وہ دو مرتبہ قومی ٹیم میں منتخب ہوتے رہ گئے جب ان کی جگہ سیلیکٹرز نے من پسند کھلاڑی منتخب کرلیے۔  وہ اس زیادتی پر دلبرداشتہ ہوگئے،  اور انگلینڈ میں سرے لیگ کھیلنے لگے۔ جہاں ان کی ملاقات سائمن بیکر سے ہوئی۔ جو ان کو نیوزی لینڈ لے گئے۔

 محمد عباس ابتدا میں آکلینڈ میں پروفیشنل کرکٹ کھیلتے رہے۔ تاہم چند سال بعد جب انہیں کروری کلب ویلنگٹن سے کھیلنے کی دعوت ملی تو وہ فیملی کے ساتھ شفٹ ہوگئے۔ ویلنگٹن میں کرکٹ کی سہولیات بہت بہتر تھی جس سے محمد عباس کو لڑکپن میں ہی کرکٹ کی بہترین سہولیات مل گئی۔

اظہر عباس اب ویلگنٹن کے مختلف کلبز میں بولنگ کوچنگ کرتے ہیں، وہ تحریک انصاف کی اسپورٹس کمیٹی کے وائس چیئرمین ہیں، اور کافی عرصہ عمران خان کے چیف آف اسٹاف بھی رہے ہیں۔ وہ نیوزی لینڈ میں ایک سماجی تنظیم پیس فاؤنڈیشن چلارہے ہیں۔

محمد عباس کا خوابناک آغاز

محمد عباس نے آج جب اپنے کیریئر کا آغاز کیا، تو پہلے میچ میں ہی ریکارڈ بناگئے۔ انہوں نے 24 گیندوں پر نصف سنچری بناکر نیا ریکارڈ قائم کردیا۔  محمد عباس جو ابتدائی طور پر والد کی طرح بائیں ہاتھ سے فاسٹ بولنگ کرتے تھے لیکن جب انھیں بیٹنگ کا موقع ملتا تو جارحانہ انداز اپناتے جس سے وہ ڈومیسٹک کرکٹ میں بہت مشہور ہوگئے انھیں 16 سال کی عمر میں ویلنگٹن کرکٹ کلب نے معاہدے کی پیشکش کی۔ جس نے ان کے عزائم کو پختہ کردیا۔وہاں انہیں دیپک پاٹل کی کوچنگ میسر آگئی۔ جس نے ان کے ٹیلنٹ کو سنوارا۔  پاٹل نے بوکنگ رن اپ درست کیا۔  اسی دوران وہ بروس ایڈگر سے کوچنگ لینے لگے جو اپنے زمانے کے بہترین بلے باز تھے۔  اس سارے ماحول نے عباس میں بہت عمدہ تربیت کی اور وہ نمایاں کرکٹر بن گئے۔

    محمد عباس کے حالیہ انتخاب کی وجہ ان کی فورڈ ٹرافی کے میچوں میں زبردست کارکردگی سے بنی۔  انہوں نے ایک سنچری اور چار نصف سنچریاں بناکر سب کی توجہ مبذول کرالی۔  جب نیوزی لینڈ کے اکثر کھلاڑی آئی پی ایل کے لیے چلے گئے تو پاکستان کے خلاف سیریز میں کیوی کوچ گیری اسٹیڈ کی نظر ان پر پڑی۔

محمد عباس کہتے ہیں کہ جب گیری نے مجھے فون کیا اور پاکستان کے خلاف سیریز میں ٹیم میں شمولیت سے آگاہ کیا تو میں حیران ہوگیا۔  تاہم ان کے والد اظہر عباس کہتے ہیں کہ محمد کے لیے جس طرح ویلنگٹن کرکٹ کلب نے ہر ممکن سہولیات مہیا کی مجھے امید تھی کہ ایک دن یہ قومی ٹیم کی طرف سے کھیلے گا۔  میں نے اس کی پیدائش سے ہی کرکٹر بنانے کا سوچ لیا تھا۔

اولیں میچ میں شاندار کارکردگی

محمد عباس نے اپنے پہلے ہی میچ میں جس عمدگی سے بیٹنگ کی اس نے سب کو متاثر کیا۔  انہوں نے آتے ہی جارحانہ انداز اپنایا اور نسیم شاہ کو چوکا لگاکے اپنی آمد کا اعلان کیا۔ انہوں نے اس وقت بیٹنگ شروع کی جب بہت کم اوورز رہ گئے تھے اور ایسے میں اپنا پہلا میچ کھیلنے والے گھبراہٹ کا شکار ہوتے ہیں تاہم عباس نے اعتماد سے بیٹنگ کی اور آخری اوور تک کھیلے جس سے ان کی بیٹنگ کی صلاحیت عیاں ہوتی ہے۔

 عباس نے پہلے ہی میچ میں تیز ترین نصف سنچری بنائی۔  اور پھر بولنگ کرتے ہوئے محمد رضوان کی قیمتی وکٹ حاصل کی وہ بائیں ہاتھ سے میڈیم فاسٹ بولنگ کرتے ہیں، وہ ایک اچھے آل راؤنڈر سمجھے جاتے ہیں۔  وہ فرسٹ کلاس کرکٹ میں 12 وکٹ لے چکے ہیں۔  اور اپنے پہلے ہی میچ میں ان کی بولنگ بھی نیوزی لینڈ کے کام آگئی، محمد عباس ابھی جوان ہیں اور پرجوش ہیں۔ یقینی طور پر ایک تابناک کیریئر ان کا منتظر ہے۔