قومی ٹی ٹوئنٹی ٹیم کے نائب کپتان شاداب خان نے ٹیم میں واپسی کے بعد کارکردگی پر کھل کر گفتگو کرتے ہوئے کہا کہ نتائج توقع کے مطابق نہیں مگر محنت جاری ہے۔

نائب کپتان شاداب خان نے ٹیم میں واپسی کے بعد اپنی کارکردگی پر تبصرہ کرتے ہوئے کہا ہے کہ وہ تسلیم کرتے ہیں کہ نتائج ہر بار ویسے نہیں رہے جیسے امید کی جاتی ہے تاہم وہ بہتری کے لیے مسلسل محنت کر رہے ہیں۔

اپنے حالیہ انٹرویو میں شاداب خان نے کہا کہ ان کا یقین سخت محنت پر ہے اور وہ سمجھتے ہیں کہ وقت کے ساتھ اس کا پھل ضرور ملے گا۔

شاداب خان نے کہا ’’اگر آپ نتائج دیکھیں تو ایک سیریز اچھی نہیں رہی مگر میری توجہ ہمیشہ پراسس پر ہوتی ہے۔ مجھے اپنی محنت پر پورا بھروسہ ہے اور یقین ہے کہ کامیابی ضرور ملے گی‘‘۔

نائب کپتان کہتے ہیں ’’میں خود کو ایک بولنگ آل راؤنڈر سمجھتا ہوں۔ میری بیٹنگ فطری صلاحیت ہے مگر مجھے معلوم ہے کہ بولنگ پر مزید کام کرنے کی ضرورت ہے‘‘۔

انہوں نے مزید کہا کہ کرکٹ میں تسلسل اور خود پر یقین سب سے اہم ہوتے ہیں اور وہ اسی جذبے کے ساتھ اپنی کارکردگی کو بہتر بنانے کی کوشش کررہے ہیں۔

خیال رہے کہ ​دورہ نیوزی لینڈ میں شاداب خان کی کارکردگی کافی مایوس کن رہی اور وہ توقعات پر پورے نہیں اترے۔

پانچ میچوں کی ٹی ٹوئنٹی سیریز میں انہوں نے چار اننگز میں مجموعی طور پر 58 رنز بنائے جس میں ان کا سب سے زیادہ اسکور 28 رنز تھا۔

اگر بولنگ کے شعبے کی بات کریں تو اس میں بھی انہوں نے اپنی کارکردگی سے کافی مایوس کیا جب کہ مجموعی طور پر 13 اوورز میں انہوں نے 143 رنز دے کر صرف ایک وکٹ حاصل کی تھی۔