پاکستان سپر لیگ (پی ایس ایل) 10 کے دو میچز کے شیڈول اور وینیو میں تبدیلی کر دی گئی ہے۔

پاکستان کرکٹ بورڈ (پی سی بی) کی جانب سے جاری اعلامیے کے مطابق، یکم مئی کو ملتان کرکٹ اسٹیڈیم میں کھیلا جانے والا ملتان سلطانز اور کراچی کنگز کا میچ اب لاہور کے قذافی اسٹیڈیم منتقل کر دیا گیا ہے۔

منتقل شدہ میچ دوپہر 3 بجے قذافی اسٹیڈیم میں شروع ہوگا۔ لاہور میں یکم مئی کو “ڈبل ہیڈر” ہوگا، جس میں پہلا میچ ملتان سلطانز اور کراچی کنگز کے درمیان سہ پہر 3 بجے اور دوسرا میچ لاہور قلندرز اور کوئٹہ گلیڈی ایٹرز کے درمیان رات 8 بجے کھیلا جائے گا۔

اس کے علاوہ، 10 مئی کو ملتان کرکٹ اسٹیڈیم میں شیڈول ملتان سلطانز اور کوئٹہ گلیڈی ایٹرز کا میچ اب ایک دن بعد، 11 مئی کو رات 8 بجے اسی وینیو پر ہوگا۔

مزید پڑھیں: پی ایس ایل 10 میں شائقین کی دلچسپی کیلئے انعامات کی برسات

ٹکٹس کی واپسی کے طریقہ کار کے حوالے سے پی سی بی کا کہنا ہے کہ یکم مئی کو ملتان میں ہونے والے میچ کے خریدے گئے ٹکٹس کی رقم واپس کی جائے گی۔

آن لائن خریدے گئے ٹکٹس کی رقم خودکار طریقے سے متعلقہ صارفین کے اکاؤنٹ میں واپس کر دی جائے گی۔

فزیکل خریداری کے ذریعے لیے گئے ٹکٹس کی واپسی نجی کوریئر سروس کے ذریعے کی جا سکے گی۔

علاوہ ازیں، لاہور میں یکم مئی کو خریدا گیا ایک ہی ٹکٹ شائقین کو دونوں میچ دیکھنے کی سہولت فراہم کرے گا۔

ملتان میں 10 مئی کے لیے خریدے گئے ٹکٹس اب 11 مئی کے میچ کے لیے کارآمد ہوں گے۔