ملتان: پاکستان سپر لیگ (پی ایس ایل) کے جاری سیزن میں نہ صرف ملکی بلکہ غیر ملکی صحافیوں کی دلچسپی بھی دیکھنے میں آ رہی ہے۔

بنگلہ دیش سے تعلق رکھنے والے معروف اسپورٹس صحافی تصفیق شہریار پولک پی ایس ایل کی کوریج کے لیے ملتان پہنچ چکے ہیں۔

تصفیق شہریار کو خاص طور پر لاہور قلندرز کی ٹیم میں دلچسپی ہے کیونکہ ٹیم میں بنگلادیشی کرکٹ ٹیم کے باصلاحیت ٹی ٹوئنٹی اسپنر ریشاد حسین شامل ہیں۔

ریشاد حسین نے اب تک لیگ میں بہترین کارکردگی کا مظاہرہ کرتے ہوئے دو میچز میں 6 وکٹیں حاصل کی ہیں اور نمایاں وکٹ ٹیکرز میں شامل ہوچکے ہیں۔

لاہور قلندرز کی انتظامیہ نے غیر ملکی صحافی کی آمد پر خوشی کا اظہار کرتے ہوئے انہیں ٹیم کے کپتان شاہین شاہ آفریدی کے دستخط شدہ بال کا تحفہ بھی پیش کیا۔

اس موقع پر تصفیق شہریار نے شکریہ ادا کرتے ہوئے کہا کہ پی ایس ایل کی کوریج اور لاہور قلندرز کی میزبانی ان کے لیے ایک اعزاز ہے۔

ٹیم ڈائریکٹر ثمین رانا نے کہا کہ یہ دیکھ کر خوشی ہوتی ہے کہ ریشاد حسین کی لاہور قلندرز میں شمولیت نے بنگلادیش میں پی ایس ایل کو توجہ کا مرکز بنا دیا ہے۔

انہوں نے مزید کہا کہ یہ قابلِ تعریف ہے کہ کرکٹ کس طرح قوموں کو آپس میں جوڑ رہی ہے۔

ثمین رانا کا کہنا تھا کہ لاہور قلندرز نے ہمیشہ باصلاحیت کھلاڑیوں کو ترجیح دی ہے اور ریشاد حسین کا انتخاب بھی بنگلادیشی کرکٹ پر اعتماد کا اظہار ہے۔

تصفیق شہریار نے بھی لاہور قلندرز کے اقدام کو سراہتے ہوئے کہا کہ ریشاد حسین کی ٹیم میں شمولیت نے بنگلادیشی کرکٹ شائقین کی پی ایس ایل میں دلچسپی کو مزید بڑھا دیا ہے۔