بھارتی مڈل آرڈر بلے باز شریاس ائیر کو مارچ 2025 کے لیے آئی سی سی مینز پلیئر آف دی منتھ قرار دیا گیا ہے۔

شریاس ائیر نے آئی سی سی چیمپئنز ٹرافی میں بھارت کی کامیاب مہم میں مرکزی کردار ادا کیا اور نیوزی لینڈ کے جیکب ڈفی اور راچن رویندرا کو سخت مقابلے کے بعد پیچھے چھوڑدیا۔

شریاس ائیر نے پورے ٹورنامنٹ میں 243 رنز بنا کر سب سے زیادہ اسکور کرنے والے کھلاڑی کا اعزاز حاصل کیا جب کہ انہوں نے بھارت کو چیمپئنز ٹرافی کا ٹائٹل جتوانے میں بھی اہم کردار ادا کیا۔

30 سالہ کھلاڑی نے گروپ اے کے میچ میں نیوزی لینڈ کے خلاف 79 رنز کی شاندار اننگز کھیلی جب کہ سیمی فائنل اور فائنل میں بھی قیمتی اننگز کھیل کر ٹیم کو فتح دلانے میں مدد کی۔

سیمی فائنل میں انہوں نے آسٹریلیا کے خلاف 62 گیندوں پر 45 رنز بنائے جب کہ فائنل میں نیوزی لینڈ کے خلاف 48 رنز کی پُراعتماد اننگز کھیلی۔

مارچ میں چیمپئنز ٹرافی کے تین میچز میں شریاس ائیر نے اوسطاً 57.33 کی اوسط اور 77.47 کے اسٹرائیک ریٹ سے بیٹنگ کی۔

اس موقع پر شریاس ائیر کا کہنا تھا یہ اعزاز میرے لیے بہت خاص ہے۔ آئی سی سی چیمپئنز ٹرافی جیتنا ایک ناقابلِ فراموش لمحہ تھا۔ میں اپنے ساتھی کھلاڑیوں، کوچز اور ان شائقین کا شکر گزار ہوں جن کی حمایت ہمیں ہر روز آگے بڑھنے کا حوصلہ دیتی ہے۔

واضح رہے کہ شریاس ائیر سے پہلے فروری میں شبمھن گل نے یہ اعزاز حاصل کیا تھا، یوں بھارت کو مسلسل دوسرے مہینے یہ اعزاز حاصل ہوا ہے جو عالمی سطح پر بھارتی ٹیم کی شاندار کارکردگی کا عکاس ہے۔