لاہور: پی ایس ایل 10 کے میچ آفیشلز کا اعلان کردیا گیا ہے، 13 امپائرز اور 7 ریفریز ذمہ داریاں نبھائیں گے۔

پاکستان کرکٹ بورڈ نے پاکستان سپر لیگ (پی ایس ایل) کے سیزن 10 کے میچ آفیشلز کا اعلان کردیا ہے۔ لیگ کا یہ ایڈیشن 11 اپریل سے 18 مئی تک کھیلا جائے گا جس میں 13 امپائرز اور 7 میچ ریفریز مختلف میچز میں فرائض سرانجام دیں گے۔

امپائرز پینل میں آئی سی سی ایلیٹ پینل کے معروف امپائرز احسن رضا، آسٹریلیا کے پال رائفل اور سری لنکا کے کمار دھرما سینا شامل ہیں۔ ان کے ساتھ الیکس واف اور کرس براؤن بھی امپائرنگ کی ذمہ داریاں نبھائیں گے۔

پاکستانی امپائرز میں علیم ڈار، آصف یعقوب، فیصل خان آفریدی، راشد ریاض اور وقار حسین شامل ہیں جو تمام پی سی بی کے انٹرنیشنل امپائرز پینل کا حصہ ہیں۔

علاوہ ازیں پی سی بی ایلیٹ پینل آف امپائرز سے عبدالمقیت، ناصر حسین، طارق رشید اور ذوالفقار جان بھی امپائرنگ کریں گے۔

پی ایس ایل 10 کا یہ ایڈیشن علیم ڈار کے لیے آخری ایڈیشن ہوگا جس میں وہ امپائرنگ کے فرائض انجام دیں گے۔

میچ ریفریز کے پینل میں آئی سی سی ایلیٹ پینل آف میچ ریفریز کے رکن رنجن مدوگالے اور ان کے سری لنکن ساتھی روشن مہاناما بھی شامل ہیں جو میچز کی نگرانی کریں گے جب کہ دیگر ریفریز میں علی نقوی، محمد جاوید ملک، افتخار احمد، اقبال شیخ اور ندیم ارشد بھی شامل ہیں۔

پی سی بی نے اعلان کیا ہے کہ تمام آفیشلز کو بین الاقوامی معیار کے مطابق تربیت دی گئی ہے تاکہ ٹورنامنٹ شفافیت، مہارت اور بہترین کرکٹنگ اصولوں کے تحت مکمل ہو۔