لاہور: آئی سی سی ویمنز کرکٹ ورلڈ کپ کوالیفائر کے وارم اپ میچ میں پاکستان نے ویسٹ انڈیز کو شکست دے کر مسلسل دوسری شاندار فتح حاصل کرلی۔

پاکستان ویمنز کرکٹ ٹیم نے آئی سی سی ویمنز کرکٹ ورلڈ کپ کوالیفائر کے دوران ویسٹ انڈیز کو 5 وکٹوں سے شکست دے کر مسلسل دوسرے وارم اپ میچ میں شاندار کارکردگی کا مظاہرہ کیا۔

پاکستان نے 46.1 اوورز میں 192 رنز بنا کر میچ اپنے نام کیا جب کہ پاکستانی بیٹرز منیبہ علی اور نتالیہ پرویز کی ذمہ دارانہ بیٹنگ نے پاکستان کی جیت میں اہم کردار ادا کیا۔

منیبہ علی نے 113 گیندوں پر 87 رنز جب کہ نتالیہ پرویز نے 60 گیندوں پر 53 رنز بنائے۔ گل فیروزہ نے 55 گیندوں پر 28 رنز بنائے۔

اس سے قبل ویسٹ انڈیز نے 50 اوورز میں 8 وکٹوں کے نقصان پر 188 رنز کا ہدف دیا تھا۔ پاکستانی باؤلرز میں سعدیہ اقبال نے 21 رنز دے کر 3 کھلاڑیوں کو آؤٹ کیا جب کہ نشرہ سندھو نے 47 رنز دے کر 2 کھلاڑیوں کو آؤٹ کیا۔

فاطمہ ثناء نے 35 رنز دے کر ایک کھلاڑی کو آؤٹ کیا، ڈیانا بیگ نے 42 رنز دے کر ایک اور رامین شمیم نے 24 رنز دے کر ایک کھلاڑی کو آؤٹ کیا۔

ویسٹ انڈیز کی بیٹر شبیکا گجنابی 68 رنز بنا کر ناٹ آؤٹ رہیں جب کہ جینا گلاسکو نے 41 رنز بنائے۔

واضح رہے کہ پاکستانی ویمنز کرکٹ ٹیم آئی سی سی ویمنز کرکٹ ورلڈ کپ کوالیفائنگ راؤنڈ کا پہلا میچ 9 اپریل کو آئرلینڈ کے خلاف کھیلے گی۔ یہ میچ ایل سی سی اے گراؤنڈ میں صبح ساڑھے نو بجے شروع ہوگا۔