قومی کرکٹر شعیب ملک نے خود پر ہونے والی تنقید کا جواب دیتے ہوئے کہا ہے کہ ان کے پی سی بی کے ساتھ کیے گئے معاہدے میں انہیں پی ایس ایل میں کھیلنے کی اجازت دی گئی ہے اور وہ اس معاہدے کے تحت اپنی ذمہ داریاں ادا کر رہے ہیں۔

شعیب ملک جو اس وقت پی ایس ایل 10 میں کوئٹہ گلیڈی ایٹرز کی نمائندگی کررہے ہیں، شدید تنقید کا سامنا کر رہے ہیں۔ جس میں ان کے 43 سال کی عمر میں کھلاڑی اور مینٹور کے طور پر دوہری ذمہ داریوں پر سوالات اٹھائے گئے ہیں۔

ناقدین شعیب ملک کو یہ تجویز دے رہے ہیں کہ وہ 43 سال کی عمر میں نوجوان کھلاڑیوں کی مینٹورنگ پر زیادہ توجہ دیں اور میدان میں کھیلنے سے گریز کریں۔

شعیب ملک نے میڈیا سے بات کرتے ہوئے خود پر ہونے والی تنقید کا جواب دیا اور کہا کہ اسکواڈ کی حکمت عملی کی ذمہ داری ٹیم کی قیادت پر ہے جب کہ کھلاڑیوں کا کام جب موقع ملے تو بہترین کارکردگی دکھانا ہے۔

انہوں نے اس بات کا ذکر کیا کہ ٹیم ماضی کی غلطیوں کو سدھارنے اور آئندہ بہتر نتائج دینے کے لیے سخت محنت کر رہی ہے۔ شعیب ملک نے کہا کہ وہ جب تک ٹیم کو ضرورت ہوگی دستیاب رہیں گے۔

ان کا کہنا تھا کہ لوگ اکثر یہ سوال کرتے ہیں کہ میں ابھی تک کیوں کھیل رہا ہوں لیکن کوئی یہ نہیں پوچھتا کہ وہ پاکستان کے کھلاڑی جو اس وقت پی ایس ایل میں نہیں ہیں ان کے بارے میں کیوں نہیں بات کی جاتی؟۔

واضح رہے کہ پی ایس ایل میں دو میچز کھیلنے کے دوران شعیب ملک صرف 14 رنز ہی بنا پائے ہیں لیکن وہ اپنی ٹیم کی کامیابی کے لیے پرعزم ہیں۔