ٹی 20 سیریز کے پہلے میچ پاکستان نے بنگلا دیش کو 37 رنز سے شکست دے کر سیریز میں ایک صفر کی برتری حاصل کر لی ہے۔

پاکستان کے 201 رنز کے جواب میں بنگلا دیش کی پوری ٹیم 19.2 اوورز میں 164 رنز بنا کر آؤٹ ہو گئی۔

گرین شرٹس کے 201 رنز کے تعاقب میں بنگلا دیش کے بیٹر تنزید حسن نے 31 رنز بنائے، کپتان لٹن داس نے 48 رنز کی اننگ کھیلی۔

توحید ہردوائے 17 اور ذاکر علی نے 36 رنز بنائے، بنگلا دیش کے 7 کھلاڑی ڈبل فیگر میں داخل نہ ہو سکے۔

پاکستان کی جانب سے حسن علی نے 5 وکٹیں حاصل کیں، شاداب خان 2، خوشدل شاہ 1، سلمان آغا 1 اور فہیم اشرف نے ایک کھلاڑی کو آؤٹ کیا۔

پاکستان اور بنگلا دیش کے درمیان جاری ٹی 20 سیریز کے پہلے میچ میں گرین شرٹس نے بنگال ٹائیگرز کو جیت کے لیے 202 رنز کا ہدف دے دیا۔

لاہور کے قذافی اسٹیڈیم میں ہونے والے اس میچ میں پاکستان نے ٹاس جیت کر پہلے بیٹنگ کی اور مقررہ 20 اوورز میں 7 وکٹوں کے نقصان پر 201 رنز بنائے۔

صرف 5 رنز پر دو وکٹیں گرنے کے بعد پاکستان نے بنگلا دیشی بالرز کا جم کر مقابلہ کیا، صائم ایوب کوئی رن بنائے بغیر آؤٹ ہوئے، فخر زمان صرف ایک رن کے مہمان بنے۔

 محمد حارث نے 31 اور کپتان سلمان علی آغا نے ذمہ دارانہ بیٹنگ کا مظاہرہ کرتے ہوئے 56 رنز کی خوبصورت اننگ کھیلی۔

حسن نواز 44 اور شاداب خان نے 48 رنز بنائے، فہیم اشرف 11 رنز پر ناٹ آؤٹ رہے۔

بنگلا دیش کی جانب سے شرف الاسلام نے 2 وکٹیں حاصل کیں جبکہ مہدی حسن، حسن محمود، تنظیم حسن، رشاد حسین اور شمیم حسین نے ایک ایک کھلاڑی کو آؤٹ کیا۔

بنگلا دیش کے خلاف 3 میچوں کی ٹی 20 سیریز کے پہلے میچ میں پاکستان نے ٹاس جیت کر پہلے بیٹنگ کا فیصلہ کیا ہے۔

لاہور کے قذافی اسٹیڈیم میں کھیلے جانے والے اس میچ میں سیکیورٹی کے سخت انتظامات کیے گئے ہیں۔

گرین شرٹس کے کپتان سلمان علی آغا کا ٹاس کے بعد کہنا تھا کہ بڑاٹوٹل اسکور کرنےکی کوشش کریں گے، 11 کھلاڑیوں کا انتخاب کرنا بہت مشکل فیصلہ تھا۔

کپتان نے کہا کہ تمام کھلاڑیوں نے پی ایس ایل میں شاندارپرفارمنس دی، ہمارا پلان یہی ہے کہ ماڈرن کرکٹ کھیلیں اور تمام کھلاڑیوں سے یہی توقع ہے کہ اپنی بہترین پرفارمنس دیں۔

بنگلا دیش کرکٹ ٹیم کے کپتان لٹن داس نے کہا کہ یو اے ای کیخلاف سیریزمیں اچھا کھیلےمگر جیت نہیں سکے، ہمیں پاکستان کے خلاف بیٹنگ اور بولنگ دونوں میں اچھا پرفارم کرنا ہو گا۔

اسکواڈ:

پاکستان: فخر زمان، صائم ایوب، محمد حارث، سلمان آغا (کپتان)، حسن نواز، شاداب خان، خوشدل شاہ، فہیم اشرف، حسن علی، حارث رؤف، ابرار احمد

بنگلا دیش: لٹن داس (کپتان)، تنزید حسن، پرویز حسین، توحید ہردوائے، ذاکر علی، شمیم حسین، مہدی حسن، رشاد حسین، تنظیم حسین شکیب، حسن محمود، شرف الاسلام