لاہور: پاکستان سپر لیگ (پی ایس ایل) سیزن 10 کی ٹائٹل دوڑ کا آغاز کل سے دوبارہ شروع ہونے جارہا ہے۔

پی ایس ایل 10 میں کل بابر اعظم کی پشاور زلمی کا مقابلہ ڈیوڈ وارنر کی کراچی کنگز سے راولپنڈی کرکٹ اسٹیڈیم میں ہوگا۔

پچھلے سال کی رنرز اپ ملتان سلطانز پلے آف سے باہر ہوگئی ہے۔ باقی پانچ ٹیمیں پلے آف کے لیے کوالیفائی کرنے کے لیے میدان میں ہیں۔

کوئٹہ گلیڈی ایٹرز اور کراچی کنگز بالترتیب 13 اور 10 پوائنٹس کے ساتھ پہلے اور دوسرے نمبر پر موجود ہیں جب کہ اسلام آباد یونائیٹڈ، لاہور قلندرز اور پشاور زلمی کو لازمی میچ جیتنے کے امکانات کا سامنا ہے۔

اتوار 18 مئی کو ڈبل ہیڈر میں ملتان سلطانز کا مقابلہ کوئٹہ گلیڈی ایٹرز سے اور پشاور زلمی کا مقابلہ لاہور قلندرز سے ہوگا۔ شاداب خان کی اسلام آباد یونائیٹڈ 19 مئی کو لیگ کے آخری میچ میں کراچی کنگز سے مقابلہ کرے گی۔

کوالیفائر، ایلیمینیٹر 1 اور 2 جب کہ فائنل 21 سے 25 مئی تک قذافی اسٹیڈیم لاہور میں کھیلے جائیں گے۔ پی ایس ایل کے 26 میچوں کے بعد محمد رضوان 363، صاحبزادہ فرحان 321 اور فخر زمان 309 رنز کے ساتھ ٹاپ تھری رنز بنانے والے بیٹرز ہیں۔

بولنگ میں محمد عباس آفریدی اور جیسن ہولڈر آٹھ میچوں میں 15، 15 وکٹوں کے ساتھ مشترکہ طور پر سب سے زیادہ وکٹیں لینے والے کھلاڑی ہیں ۔ ابرار احمد اور حسن علی مشترکہ طور پر دوسرے نمبر پر ہیں جنہوں نے 14، 14 وکٹیں حاصل کی ہیں۔

وکٹ کیپنگ میں پشاور زلمی کے محمد حارث نے سب سے زیادہ 10 کیچز اور اسٹمپڈ کیے ہیں۔ کوئٹہ گلیڈی ایٹرز کے رائلے روسو نے سب سے زیادہ 11 کیچ کیے ہیں۔

ٹکٹوں کی اپ ڈیٹ

وہ شائقین جنہوں نے 8 مئی کو پشاور زلمی بمقابلہ کراچی کنگز، 9 مئی پشاور زلمی بمقابلہ لاہور قلندرز اور 10 مئی اسلام آباد یونائیٹڈ بمقابلہ کراچی کنگز کے میچز کے ٹکٹ خریدے تھے اب وہی ٹکٹیں بالترتیب 17، 18 اور 19 مئی کے میچز کے لیے استعمال کرسکتے ہیں۔

راولپنڈی کرکٹ اسٹیڈیم میں 18 مئی کو ڈبل ہیڈر ڈے ہونے کی وجہ سے، پہلے جاری کردہ 9 مئی کا ٹکٹ دونوں میچوں میں استعمال کیا جا سکتا ہے۔ دوپہر کا میچ  3.30 بجے شروع ہوگا جب کہ دوسرا میچ رات 8 بجے شروع ہوگا۔

18 مئی کے میچ کے علاوہ شام کے دیگر تمام میچز شام 7.30 بجے شروع ہوں گے۔ جن شائقین نے ایلیمینیٹر 1، 2 اور فائنل کے ٹکٹ خریدے ہیں وہ متعلقہ میچوں کی نئی اعلان کردہ تاریخوں کے مطابق انہیں استعمال کرسکتے ہیں۔