نئی دہلی: بھارت کی انتہا پسند جماعت شیو سینا نے ایک بار پھر بھارت اور پاکستان کے درمیان کرکٹ میچ کی مخالفت کرتے ہوئے وزیرِ اعظم نریندر مودی اور دیگر اعلیٰ حکام کو خط لکھ دیا۔

غیر ملکی خبر رساں ادارے کی رپورٹ کے مطابق بھارت کی انتہا پسند جماعت کے رہنماؤں نے ہر بار کی طرح اس مرتبہ بھی پاک بھارت مقابلے کی مخالفت کی ہے جب کہ میچ کو رکوانے کے لیے وزیر اعظم مودی کو بھی خط لکھ دیا ہے۔

شیو سینا کے مرکزی رہنما اور رکنِ پارلیمان سنجے راؤت نے وزیرِ اعظم مودی کے نام خط میں کہا کہ پہلگام حملے میں جاں بحق ہونے والوں کا خون ابھی خشک نہیں ہوا اور ان کے اہل خانہ کے زخم ابھی تازہ ہیں۔

انہوں نے لکھا کہ ایسے میں پاکستان کے ساتھ کرکٹ کھیلنا شہداء اور ان کے لواحقین کے ساتھ ناانصافی ہے جب کہ انہوں نے یہ خط سوشل میڈیا پر بھی شیئر کیا۔

شیو سینا کی ترجمان اور رکنِ پارلیمان پرینکا چترویدی نے بھی وزیر اطلاعات اشونی ویشنو کو خط لکھا ہے جس میں کہا گیا ہے کہ انڈیا اور پاکستان کے درمیان میچ کی نشریات براہِ راست نہ کی جائیں۔

خیال رہے کہ یہ پہلا موقع نہیں کہ ایشیاکپ کے دوران بھارت میں پاکستان کے ساتھ کھیلنے پر اعتراض کیا گیا ہو۔

واضح رہے کہ ایشیا کپ کے گروپ اے میں پاکستان، بھارت، عمان اور متحدہ عرب امارات شامل ہیں جب کہ 14 ستمبر کو روایتی حریفوں کا مقابلہ دبئی میں ہوگا۔