ورلڈ چیمپئن شپ آف لیجنڈز کے دوسرے سیمی فائنل میں جنوبی افریقہ چیمپئنز نے انتہائی سنسنی خیز مقابلے کے بعد آسٹریلیا چیمپئنز کو 1 رن سے شکست دے کر فائنل کے لیے کوالیفائی کر لیا۔

186 رنز کے ہدف کے تعاقب میں آسٹریلوی ٹیم 20 اوورز میں 7 وکٹوں کے نقصان پر 185 رنز ہی بنا سکی اور یوں فتح سے صرف ایک رن دور رہ گئی۔

آسٹریلیا کی اننگز

آسٹریلیا کی جانب سے ڈینئل کرسچن نے سب سے زیادہ 49 رنز کی اننگز کھیلی۔ دیگر نمایاں بیٹرز میں کرس لن 35، ڈارسی شارٹ 33، شان مارش 25 اور بین ڈنک 12 رنز کے ساتھ شامل رہے۔

اس کے علاوہ راب کوئنی 9 رنز پر ریٹائرڈ ہرٹ ہو گئے جبکہ بین کٹنگ 8، فرگوسن 3 اور کولٹر نائل بغیر کوئی رن بنائے آؤٹ ہوئے۔

جنوبی افریقہ کی جانب سے وین پارنل اور ہارڈس ولژون نے 2،2 وکٹیں حاصل کیں جبکہ ڈوان اولیور اور عمران طاہر نے 1،1 کھلاڑی کو پویلین بھیجا۔

جنوبی افریقہ کی بیٹنگ

اس سے قبل جنوبی افریقہ نے ٹاس جیت کر بیٹنگ کا فیصلہ کیا اور 20 اوورز میں 8 وکٹوں کے نقصان پر 186 رنز بنائے۔

بلے بازوں میں مورن وین وائک 76 اور جے جے اسمٹس 57 رنز کے ساتھ نمایاں رہے اور دیگر کھلاڑیوں میں ژاں پال ڈومنی 14، ہنری ڈیوڈز 11، سریل اروی 9، اے بی ڈی ویلیئرز 6، وین پارنل 3 اور ہارڈس ولژون بغیر کوئی رن بنائے آؤٹ ہوئے جبکہ جیک روڈولف (1) اور ایرون فنگیسو (0) ناٹ آؤٹ رہے۔

آسٹریلیا کی طرف سے پیٹر سڈل نے شاندار بولنگ کرتے ہوئے 4 وکٹیں حاصل کیں جبکہ ڈارسی شارٹ نے 2، بریٹ لی اور ڈینئل کرسچن نے 1،1 وکٹ حاصل کی۔

فائنل کب اور کس کے خلاف؟

ایونٹ کا فائنل 2 اگست کو کھیلا جائے گا، جہاں جنوبی افریقہ کا مقابلہ پاکستان چیمپئنز سے ہو گا۔

یاد رہے کہ پہلے سیمی فائنل میں بھارت نے پاکستان کے خلاف کھیلنے سے انکار کیا تھا، جس کے باعث پاکستان کو واک اوور مل گیا اور وہ براہِ راست فائنل میں پہنچ گیا۔