ابو ظہبی: ایشیاکپ 2025 کے ساتویں میچ میں یو اے ای نے 42 رنز سے عمان کو شکست دے دی۔

متحدہ عرب امارات (یو اے ای) اور عمان کی ٹیموں کے درمیان ایشیاکپ 2025 کے گروپ مرحلے کا ساتواں میچ ابو ظہبی میں کھیلا گیا جس میں یو اے ای نے باآسانی جیت اپنے نام کی۔

یو اے ای کی اننگز

عمان نے ٹاس جیت کر فیلڈنگ کا فیصلہ کیا جو غلط ثابت ہوا جب کہ یو اے ای نے پہلے نے پہلے کھیلتے ہوئے مقررہ 20 اوورز میں 5 وکٹوں کے نقصان پر 172 رنز اسکور کیے۔

متحدہ عرب امارات کی جانب سے کپتان محمد وسیم 69 رنز کے ساتھ نمایاں بلے باز رہے جب کہ اوپنر علیشان شرافو نے بھی ان کا بھرپور ساتھ دیا اور نصف سنچری کی بدولت 51 رنز بناکر آؤٹ ہوئے۔

علاوہ ازیں محمد زوہیب 21، آصف خان 2 اور راحل چوپڑا صفر پر آؤٹ ہوئے جب کہ ہرشت کوشل 19 اور دھروو پراشر 1 رن کے ساتھ ناٹ آؤٹ رہے۔

عمان کی جانب سے جیتن رامنندی نے 2 کھلاڑیوں کو آؤٹ کیا، سامے شریواستو اور حسنین شاہ کے حصے میں ایک ایک وکٹ آئی۔

عمان کی اننگز

ہدف کے تعاقب میں عمان کے بلے باز شروعات سے ہی مشکلات کا شکار دکھائی دیے اور پوری ٹیم 18.4 اوورز میں 130 رنز پر ڈھیر ہوگئی۔

آرین بشت 24، وکٹ کیپر ونایک شکلا 20، کپتان جتندر سنگھ 20 اور جیتن رامنندی 13 بناکر آؤٹ ہوئے، شکیل احمد 14 رنز بناکر ناٹ آؤٹ رہے جب کہ دیگر کھلاڑیوں میں سے کوئی بھی ڈبل فیگرز میں داخل نہ ہوسکا۔

یو اے ای کی جانب سے جنید صدیقی نے 4 شکار کیے، حیدر علی اور جواد اللہ نے 2،2 کھلاڑیوں کو آؤٹ کیا جب کہ ایک وکٹ محمد روحد نے حاصل کی۔

واضح رہے کہ یو اے ای کا اگلا مقابلہ 17 ستمبر کو پاکستان سے ہوگا جس میں جیتنے والی ٹیم کا اگلے مرحلے میں پہنچنے کا امکان ہے۔