ایشین کرکٹ کونسل (اے سی سی) کے صدر جے شاہ کا کہنا ہے کہ ٹیموں نے ستمبر کے مہینے میں یو اے ای میں ون ڈے میچز کھیلنے پر تحفظات کا اظہار کیا تھا ۔

تفصیلات کے مطابق ایشیا کپ 2023  دبئی کی بجائے سری لنکا میں کرانے کے معاملے پر صدر اے سی سی جے شاہ نے بھارتی اخبار کو انٹرویو دیتے ہوئے کہا کہ  تمام فل ممبرز ،میڈیا رائٹس ہولڈرز اور ان اسٹیڈیم رائٹس ہولڈرز پورا ٹورنامنٹ پاکستان میں کھیلنے پر ہچکچاہٹ کا مظاہرہ کر رہے تھے۔

جے شاہ نے کہا کہ یہ سب سیکیورٹی خدشات اور ملک کی معاشی صورتحال کی وجہ سے تھا۔ اے سی سی کے صدر کی حیثیت سے مجھے اس کا مناسب حل نکالنا تھا۔

انہوں نے کہا کہ پی سی بی کے اے سی سی سے مل کر بنائے جانےوالے ہائیبرڈ ماڈل کو تسلیم کیا۔ یہ بات اہم ہے کہ پاکستان کرکٹ بورڈ میں متعدد تبدیلیاں ہوئیں، بات چیت بھی اوپر نیچے ہوئی۔

صدر اے سی سی نے کہا کہ یو اے ای میں 2022 میں کھیلا جانے والا ایشیا کپ ٹی ٹوئنٹی فارمیٹ کا تھا ۔اب اس کا موازنہ 100 اوورز کے ون ڈے فارمیٹ سے نہیں کیا جا سکتا۔

جے شاہ نے مزید کہا کہ اگر دبئی میں میچز کا شیڈول ہوتا تو کھلاڑی تھکاوٹ کا شکار ہوتے  اور انجری کے امکانات بڑھ جاتے جبکہ ورلڈکپ بھی شروع ہونے والا ہے۔

ان کا کہنا تھا کہ ایشیا کپ کے شیڈول کو کھلاڑیوں کی صحت اور حفاظت کو مدنظر رکھ کر بنایا گیا ۔ مقصد صرف یہ تھا کہ ٹورنامنٹ میں اچھے مقابلے ہوں اور اسے کامیاب بنایا جائے۔

صدر اے سی سی نے کہا کہ ورلڈ کپ سے قبل ٹیموں کے کھلاڑیوں کی صحت کا خیال رکھا گیا ہے تاکہ وہ مکمل تیار رہیں۔

اگر آپ حالاتِ حاضرہ سے باخبر رہنا چاہتے ہیں تو ہمارے فیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے کو سبسکرائب کریں   اور بیل آئیکن پر کلک کریں