پاکستان کرکٹ ٹیم کے دورہ آسٹریلیا میں  کس کا مقابلہ کس سے ہوگا، وکٹ کیپر بلے باز سرفراز  احمد نے بتادیا۔

تفصیلات کے مطابق قومی کرکٹ ٹیم کے وکٹ کیپر بلے باز سرفراز احمد نے دورہ آسٹریلیا کے دوران کھلاڑیوں کے آپسی مقابلوں کے بارے میں  بتاتے ہوئے کہا کہ  بابر بمقابلہ اسمتھ اور اسٹارک بمقابلہ شاہین فینز کی توجہ کا مرکز ہوگا۔

انہوں نے کہا کہ  بابر اعظم اور اسٹیو اسمتھ دونوں ہی عالمی معیار کے بلے باز ہیں۔ بینو قادر ٹرافی میں ان دونوں کھلاڑیوں کو لائیو ایکشن میں دیکھنا نوجوان کرکٹرز کے لیے بہترین موقع ہوگا۔

سرفراز احمد نے کہا کہ  شاہین آفریدی اور مچل اسٹارک بہترین بولرز ہیں جو کسی بھی وقت مخالف ٹیم کو پریشان کر سکتے ہیں۔شاہین آفریدی نے گزشتہ سیریز میں ڈیوڈ وارنر کے خلاف شاندار بولنگ کا مظاہرہ کیا تھا۔ اس مرتبہ بھی فینز شاہین آفریدی اور ڈیوڈ وارنر کا ٹاکرا دیکھنے کے منتظر ہوں گے۔

انہوں نے مزید کہا کہ  آسٹریلیا کی کنڈیشنز ہمیشہ چیلنجنگ ہوتی ہیں۔ دو  مرتبہ آسٹریلیا کا دورہ کیا ہے، یہاں سیکھنے کا بہت موقع ملتا ہے۔

سرفراز احمد نے کہا کہ  بیرون ملک مقیم پاکستان کرکٹ فینز ہمیشہ پاکستان ٹیم کی حمایت کرتے ہیں۔یقین ہے آسٹریلیا کے خلاف سیریز میں بھی فینز بڑی تعداد میں اسٹیڈیم کا رخ کریں گے۔