قومی ٹیم کے اسپنر ابرار احمد اور ٹاپ آرڈر بیٹر کامران غلام کو بنگلادیش  کے خلاف پہلے ٹیسٹ میچ کے اسکواڈ سے ریلیز کردیا گیا۔

پاکستان کرکٹ بورڈ (پی سی بی) کی جانب سے جاری کردہ پریس ریلیز میں کہا گیا ہے کہ اسپنر ابرار احمد اور ٹاپ آرڈر بیٹر کامران غلام بنگلادیش اے کے خلاف دوسرے چار روزہ میچ میں پاکستان شاہینز کی نمائندگی کریں گے ۔

سلیکٹرز  کا کہنا ہے کہ بنگلادیش کے خلاف راولپنڈی میں شروع ہونے والے ٹیسٹ میچ میں  اوور کاسٹ کنڈیشنز پیس اٹیک کے لیے موزوں ہوں گی اس لیے ابرار احمد کو  شامل نہیں کیا گیا۔

ابرار احمد کو بینچ پر بٹھانے کے بجائے پاکستان شاہینز اسکواڈ میں شامل کیا ہے تا کہ وہ 30 اگست کو شروع ہونے والے دوسرے ٹیسٹ سے قبل کچھ میچ پریکٹس حاصل کرسکیں۔

اسی طرح ٹاپ آرڈر بیٹر کامران غلام دوسرے کھلاڑی ہیں جنہیں پاکستان ٹیسٹ ٹیم سے ریلیز کیا گیا ہے اور انہیں دوسرے چار روزہ میچ کیلئے پاکستان شاہینز کی ٹیم میں برقرار رکھتے ہوئے سعود شکیل کی جگہ کپتان مقرر کیا گیا ہے۔

اس کا مطلب ہے کہ پاکستان ٹیسٹ ٹیم 15 کھلاڑیوں تک محدود ہوگئی ہے لیکن دوسرے چار روزہ میچ کے اختتام کے بعد ابرار احمد اور کامران  غلام کراچی ٹیسٹ سے قبل دوبارہ ٹیم میں شامل ہاجائیں گے۔

پاکستان شاہینز ٹیم کا حصہ رہنے والے میر حمزہ، محمد علی، محمد ہریرہ، نسیم شاہ، صائم ایوب، سرفراز احمد اور سعود شکیل اب ٹیسٹ ٹیم میں شامل ہو گئے ہیں جبکہ محمد رمیز جونیئر دوسرے چار  روزہ میچ سے باہر ہوگئے ہیں۔

ان آٹھ کھلاڑیوں کی جگہ پاکستان شاہینز کے اسکواڈ میں ابرار احمد، علی زریاب آصف، اویس انور، امام الحق، نیاز خان، قاسم اکرم، روحیل نذیر اور شیرون سراج کو شامل کیا گیا ہے۔

پاکستان شاہینز اور بنگلادیش اے کے درمیان دوسرا 4 روزہ میچ   منگل 20 اگست سے اسلام آباد کلب میں شروع ہوگا۔