قومی  کرکٹ ٹیم کے ریڈ بال فارمیٹ کے ہیڈکوچ جیسن گلیسپی نے انگلینڈ کے خلاف پہلے ٹیسٹ  کے لیے اعلان کردہ اسکواڈ کا دفاع کرتے ہوئے کہا کہ ایک بری سیریز کسی کھلاڑی کی صلاحیت کا تعین نہیں کرتی۔

چیمپئنز کپ میں کمنٹری کے دوران جیسن گلیسپی نے کہا کہ اسکواڈ میں تبدیلیوں کا اشارہ  دیتے ہوئے کہا کہ  اگر کھلاڑیوں کی کارکردگی میں نکھار نہیں آیا تو اسکواڈ میں بڑی تبدیلیاں ہوسکتی ہیں۔

انہوں نے کہا کہ پلیئرز کا مورال بلند رکھنے کیلئے ان کو یہ باور کروانا ضروری ہے کہ ہمیں ان پر بھروسہ ہے، یہ سب اچھے کھلاڑی ہیں، کوئی راتوں رات اپنی صلاحیت نہیں کھو دیتا، ایک یا دو خراب سیریز ان کو برا پلیئر نہیں بناسکتی۔

ہیڈ کوچ کا کہنا تھا کہ جلد بازی میں کسی کرکٹر کے مستقبل کا فیصلہ نہیں کرنا چاہتے۔

جیسن گلیسپی نے مزید کہا کہ انہوں نے پلیئر ورک لوڈ مینجمنٹ  کے حوالے سے وائٹ بال فارمیٹ کے ہیڈ کوچ گیری کرسٹن  سے بات چیت کی ہے، جس کا مقصد ملٹی فارمیٹ کھیلنے والے کرکٹرز کو آرام دینا ہے۔

سابق کپتان سرفراز احمد کی جگہ کسی نوجوان کو موقع دینے سے متعلق سوال پر جیسن گلیسپی نے کہا کہ ان جیسے عمر رسیدہ تجربہ کار کھلاڑیوں کو تبدیل کرنے کے لیے باصلاحیت نوجوان درکار ہیں۔

کامران غلام سے متعلق ہیڈ کوچ کا کہنا تھا کہ انہیں شاہینز کے ساتھ بھی دیکھا تھا، وہ اچھا پلیئر ہے، اس کی فارم اور پرفارمنس سے واقف ہوں، وہ ہماری پلاننگ میں شامل ہےتاہم اسے بتایا گیا ہے کہ اس وقت موجودہ پلیئرز کو اعتماد دیا گیا ہے، پلیئرز کو اعتماد دیتے ہیں تو ہی ان سے بہتر نتائج حاصل کرسکتے ہیں۔