چیئرمین پی سی بی  محسن نقوی نے سعودی عرب کے کھلاڑیوں کو تربیت دینے کی پیشکش کی ہے۔

ریاض میں چیئرمین پاکستان کرکٹ بورڈ (پی سی بی) محسن نقوی کی سعودی عربیہ کرکٹ فیڈریشن کے چیئرمین شہزادہ سعود بن مشعل السعود سے ملاقات ہوئی۔

ملاقات میں سعودی عرب میں کرکٹ کے فروغ اور کھلاڑیوں کی ڈویلپمنٹ پر تبادلہ خیال کیا گیا۔

چیئرمین پی سی بی نے چیئرمین سعودی عربیہ کرکٹ فیڈریشن کو چیمپئنز ٹرافی ٹورنامنٹ کے میچز دیکھنے کے لئے پاکستان کے دورے کی دعوت دی۔

محسن نقوی  نے کرکٹ کے فروغ اور اسٹیڈیمز کی تعمیر کے حوالے سے ہر ممکن تعاون کی پیشکش کی اور  سعودی عرب کے کھلاڑیوں کو تربیت دینے کی  بھی پیشکش کی۔

چیئرمین پی سی بی نے کہا کہ  کرکٹ ڈویلپمنٹ کے لئے پلیئرز ایکسچینج پروگرام شروع کیا جا سکتا ہے۔   سعودی عرب اپنے ابھرتے ہوئے کھلاڑیوں کو پاکستان بجھوا سکتا ہے۔

محسن نقوی نے کہا کہ  کرکٹ ڈویلپمنٹ اور اسٹیڈیمز کی تعمیر کے حوالے سے پوری معاونت کریں گے۔   سعودی عرب ہر پاکستانی کا دوسرا گھر ہے،تعاون پر خوشی ہو گی۔

چیئرمین سعودی عربیہ کرکٹ فیڈریشن نے کہا کہ  ہم پلیئرز ڈویلپمنٹ پر کام کر رہے ہیں۔  سعودی عرب میں کرکٹ کے تقریباً 18 ہزار کھلاڑی ہیں۔   سعودی عرب نے ایشین کرکٹ کونسل کا چیلنج کپ بھی جیتا ہے۔

انہوں نے مزید کہا کہ پاکستان کے ساتھ کرکٹ کے فروغ کیلئے قریبی تعاون کے ساتھ کام کرنا چاہتے ہیں۔