وزیراعلیٰ خیبرپختونخوا محمود خان نے گم شدہ بچوں کی بازیابی کیلئے ” میرا بچہ الرٹ” کے نام سے موبائل ایپ لانچ کر دی۔

تفصیلات کے مطابق گم شدہ بچوں اور بچوں سے زیادتی کے واقعات کی روک تھام کی جانب وزیراعلیٰ خیبرپختونخوا محمود خان نے اہم قدم اٹھاتے ہوئے صوبے میں گم شدہ بچوں کی بازیابی کیلئے موبائل اپلیکشن ” میرا بچہ الرٹ” کا باضابطہ اجراء کیا ہے۔

ذرائع کا کہنا تھا کہ میرا بچہ الرٹ” اپلیکشن پہلے سے موجود خیبر پختونخوا سٹیزن پورٹل میں بطور فیچر شامل کی گئی ہے مگراب یہ ایپ پاکستان سٹیزن پورٹل پر بھی لانچ کی جائے گی۔

ذرائع کا یہ بھی کہنا تھا کہ اپلیکشن میں گم ہونے والے بچوں کے حوالے سے رپورٹ کے اندراج ، تلاش کیلئے والدین اور مدد کیلئے مکمل طریقہ کار وضع کیا گیا ہے۔

اپلیکشن کے حوالے سے وزیراعلیٰ خیبرپختونخوا محمود خان کا کہنا تھا کہ موبائل ایپ کی مدد سے گمشدہ بچوں کو بحفاظت  بازیاب کرانا ہے جبکہ اس قدم سے بچوں سے زیادتی کے واقعات کو روکنے میں مدد بھی ملے گی۔

واضح رہے اس سے قبل پاکستانی وزیر اعظم عمران خان نے ملک میں بچوں کے جنسی استحصال کے خلاف ’میرا بچہ الرٹ‘ نامی ایک نئی موبائل فون ایپ کی تیاری کا حکم دے دیا تھا۔

پاکستانی وزیر اعظم کے دفتر کی طرف سے اسلام آباد میں جاری کردہ ایک بیان کے مطابق اس نئی ایپ کا نام ‘میرا بچہ الرٹ‘ کے ذریعے کسی بھی متاثرہ بچے یا بچی کے والدین اب تک مروجہ عشروں پرانے نظام سے بچتے ہوئے حکام کو ایسے جرائم کی فوری اطلاع دے سکیں گے۔

بچہ الرٹ نامی ایپ کے بارے میں پاکستانی وزیر اعظم کے دفتر کی طرف سےبیان میں یہ بھی کہا گیا تھا کہ اس نئے آن لائن طریقہ کار سے پولیس کو ایسے جرائم کی اطلاع دینے کی راہ میں حائل رکاوٹوں کو دور کیا جا سکے گا۔

بیان میں مزید کہا گیا تھا کہ اس ایپ کی مدد سے پاکستان کے سارے صوبوں کے حکام کو فوری اطلاع مل جایا کرے گی اور ساتھ ہی متعلقہ بچوں اور ان کی والدین کی سلامتی کو بھی یقینی بنایا جا سکے گا۔