پاکستان کو ڈیجیٹل پاکستان بنانے کی جانب ایک اور قدم بڑھاتے ہوئے ملک میں تیز ترین انٹرنیٹ سروس فائیو جی کا ٹیسٹ شروع کرنے کا فیصلہ کرلیا ہے جس کے لئے وفاقی وزارت انفارمیشن ٹیکنالوجی نے فائیو جی پاکستان پلان کمیٹی قائم کردی گئی ہے۔

فائیو جی پلان کمیٹی پاکستان میں فائیو جی ٹیکنالوجی پر روڈ میپ تیار کرے گی جبکہ کمیٹی میں وزارت ائی ٹی،  پی ٹی اے، فریکونسی ایلوکیشن بورڈ اراکین شامل ہیں۔

وزیر اعظم سیکرٹریٹ اور وزیر اعظم ٹاسک فورس،کے نمائندوں کو بھی شامل کیا گیا ہے، کمیٹی میں شعبہ تعلیم،  موبائل آپریٹرز اور ٹیلی کام سیکٹر کے اراکین بھی حصہ ہونگے۔

فائیو پلان کمیٹی فائیو جی سپکٹرم مینجمنٹ، ٹیلی کام انفراسٹرکچر ڈیولپمنٹ اور ٹیلی کام ریگولیشن پر سفارشات مرتب کرے گی جبکہ کمیٹی فائیو جی ٹیکنالوجی کے  حیاتیاتی اثراتی پر بھی اپنے سفارشات دے گی اور پاکستان میں تیاری کے حوالے سے مکمل لائحہ تیار کرے گی۔

چینی کمپنی نے دنیا کا پہلا 5 جی پرسنل کمپیوٹر متعارف کرا دیا

یاد رہے کہ ڈیجیٹل پاکستان بنانے کی جانب ایک اور قدم بڑھاتے ہوئے پاکستان ٹیلی کمیونکیشن اتھارٹی( پی ٹی اے) نے ملک میں پہلے سے سرگرمِ عمل دو غیر ملکی 2 موبائل آپریٹرز کو فائیو جی کے نان کمرشل ٹرائل کی اجازت دی تھی۔

اس سلسلے میں پی ٹی اے نے فریم ورک آف فیوچر ٹیکنالوجیز گزشتہ برس جون 2019 میں جاری کیا تھا جس میں 5 جی کو مرکزیت حاصل تھی۔

پی ٹی اے کی جانب سے جاری کردہ پریس ریلیز میں کہا گیا ہے کہ کہ زونگ اور موبی لنک کو آئندہ 6ماہ کے عرصے تک 5جی ٹیکنالوجی کی ٹیسٹنگ کی اجازت دی گئی ہے اور وہ اسے کسی بھی طور تجارتی بنیادوں پر استعمال نہیں کرسکیں گے ، ایسا کرنے کی صورت میں ان کے خلاف قانون کے مطابق کارروائی بھی کی جاسکے گی۔

یاد رہے کہ پاکستان کی 22 فیصد آبادی انٹرنیٹ استعمال کرتی ہے اور 5 جی کی دستیابی سے انٹرنیٹ صارفین کی تعداد میں غیر معمولی اضافہ متوقع ہے۔

پاکستان ٹیلی کمیونکیشن اتھارٹی کے مطابق 5 جی کی تجارتی بنیادوں پر فراہمی مقررہ وقت پر اور حکومتِ پاکستان کی پالیسی ہدایات اور باقاعدہ ریگولیٹری منظور ی کے بعد ہوگا۔

یہاں یہ بات بھی اہم ہے کہ 5 جی ٹیکنالوجی جہاں ایک جانب جدت کا ایک نیا دور ہوگا وہی اس کے انسانی صحت پر مضر اثرات کی جانب بھی ماہرین کی جانب سے مسلسل نشاندہی کی جارہی ہے۔